Korleis vertskapet skal te seg

Eit vertskap er først og fremst den eller dei som tek imot gjestane og føler eit ansvar for at dei skal trivast og ønskje å kome tilbake. Vertskapsrolla handlar ikkje berre om å ønskje velkomen, men òg om å bidra til at heilskapsinntrykket av bedrifta blir positivt.

Det første møtet er alltid viktig. Førsteinntrykket gir oss ofte eit lite innblikk i personlegdommen til gjesten, men det kan òg sende oss i feil retning, og vi kan kome i skade for å gjere oss opp ei meining om vedkomande som kan vise seg å vere feil. Det er derfor viktig at åtferda vår viser at vi som profesjonelle representantar for arbeidsplassen prøver å skaffe oss innsikt i kva behov og ønske gjesten har.

Det er lett å døme folk etter førsteinntrykket, men hugs at jobben vår er å gjere vårt beste for at alle gjestar skal kjenne seg velkomne.

Ønskjer vi ein gjest velkomen med eit smil, skaper vi ein positiv relasjon. Det er viktig å tenkje på at du sender ut signal som gjestane ser på som positive.

Gjestane legg merke til rolla di, og det er viktig at du gjer ditt beste for å ta vare på kvar enkelt gjest. Eit profesjonelt vertskap passar på at alle gjestane har det triveleg.