Folkepoesi frå Det store spranget framover (1958–60)

Det store spranget framover var ein massiv kampanje som det kinesiske kommunistpartiet sette i verk for å få ein rask auke i jordbruks- og industriproduksjonen i Kina. Resultatet var derimot katastrofalt, nemleg ein svoltkatastrofe der minst 30 millionar menneske døydde.

Også på kulturfronten blei det sett i gang ein stor poesikampanje for å beskrive kor fint og flott det nye livet ville bli. Det blei arrangert poesimøte der vanlege folk konkurrerte om å skildre det nye livet på best måte. Også her var «produksjonen» enorm. Berre i Sìchuán 四川-provinsen i Vest-Kina skal det ha blitt gitt ut fire tusen poesiantologiar.

Dei to dikta vi presenterer her, er eit eksempel på korleis enkel folkepoesi kan vere både forfriskande og rørande. I ettertid er denne kampanjen blitt kritisert for at han blei styrt av kulturbyråkratar, og for at dei òg hadde ei hand med i utforminga av poesien. Det kan godt hende det stemmer. I så fall knyter det an til visse former for tradisjonell kinesisk poesi, der det som framstår som folkepoesi, eigentleg var arbeidd på av profesjonelle poetar.

Den store poesikampanjen blei halden i første del av Det store spranget framover. Etter kvart fekk folk noko heilt anna å tenkje på enn å skrive poesi.