HMS-arbeid

Kva er HMS-arbeid?

HMS er ei forkorting for helse, miljø og sikkerheit. HMS-arbeid handlar om dei rutinane, tiltaka og haldningane vi har i kvardagen for å ta vare på dei tilsette, verne omgivnadene og trygge bedrifta sine verdiar.

For å forstå kva HMS-arbeid er, kan vi dele omgrepet inn i dei tre delane:

Helse

Helse handlar om å førebygge at tilsette blir sjuke eller får belastningsskadar av arbeidet. Det omfattar både den fysiske helsa (som ergonomi, støynivå og inneklima) og den psykiske helsa (som trivsel, tryggleik og eit godt sosialt miljø).

Miljø

Miljø omfattar både det indre arbeidsmiljøet på arbeidsplassen og det ytre miljøet rundt oss. Det handlar om å skape trygge og reine lokale for dei tilsette, samtidig som bedrifta kjeldesorterer, handterer kjemikaliar forsvarleg og unngår forureining av naturen.

Sikkerheit

Sikkerheit handlar om å førebygge ulykker, skader og uønskte hendingar. Sikkerheitsarbeidet skal verne dei tilsette mot akutte skadar, men det skal òg forhindre øydelegging av verdiar, som skadar på bygningar, maskiner, verktøy og varer.

Regelverk for HMS-arbeid

HMS-arbeidet i norske verksemder er regulert gjennom lover og forskrifter. Arbeidsmiljølova gjeld for alle og stiller krav til eit trygt og forsvarleg arbeidsmiljø, mens internkontrollforskrifta krev at verksemder jobbar systematisk med HMS og dokumenterer det.

I tillegg finst det eigne, bransjespesifikke lover og forskrifter tilpassa ulike yrke og aktivitetar. Til dømes har restaurant- og matfag strenge krav til hygiene, trygg matforedling og utstyrssikkerheit på kjøkkenet. Bygg- og anleggsbransjen har eigne reglar for sikkerheit på byggeplassar, mens helsesektoren må følge lover om smittevern og medisinhandtering.

Innanfor reiseliv finn vi spesielle lover, som til dømes tivolilova, som stiller strenge sikkerheitskrav til drift og vedlikehald av karusellar, leikeland og underhaldningsparkar. Kva for reglar som gjeld for deg, avheng av kva yrke du utdannar deg til, eller kva bransje du skal arbeide i.

Krav til HMS-arbeidet for verksemda

Verksemder skal jobbe systematisk med HMS gjennom heile året. Dei må først setje opp konkrete HMS-mål, som å hindre skadar, redusere sjukefråværet og sikre at alle bruker verneutstyr. Deretter skal dei lage enkle risikovurderingar for å avdekke moglege farar på arbeidsplassen.

Verksemda må òg sørge for å registrere alle nesten-uhell, skadar og sjukdommar, slik at dei tilsette og leiinga kan lære av hendingane og førebygge nye uhell. Til slutt må verksemda årleg vurdere om HMS-arbeidet fungerer godt nok.

Å gjennomføre HMS-arbeid

I det daglege arbeidet handlar gjennomføring av HMS-arbeid om å følge reglane og sikkerheitsrutinane i verksemda. Alle yrke har sine eigne faste prosedyrar som må følgast, anten det gjeld sjekklister ved starten av arbeidsdagen, trygg handtering av utstyr og maskiner eller retningslinjer for hygiene, låsing og alarm.

For ein vektar på ein flyplass handlar gjennomføring av HMS-arbeid i stor grad om å sikre at flyplassområdet og flyavgangane er trygge for alle. Vektaren sjekkar passasjerar og handbagasje med røntgenmaskiner og detektorar for å hindre at farlege gjenstandar blir tekne med om bord.

Samtidig må vektaren vareta si eiga og kollegaene si helse og sikkerheit. Det betyr å bruke gode ergonomiske løfteteknikkar ved tunge vesker, variere arbeidsstillingane undervegs i skiftet, og bruke innlærte deeskaleringsmetodar dersom det oppstår krevjande situasjonar med stressa passasjerar.

Samarbeid, leiing og trivsel

Eit godt HMS-arbeid handlar ikkje berre om rutinar og utstyr, men om korleis leiarar og tilsette samarbeider i kvardagen. Ein god og open dialog, slik avtalen om eit meir inkluderande arbeidsliv (IA-avtalen) beskriv, er heilt avgjerande for å skape ein trygg arbeidsplass med lågt sjukefråvær.

Ein god arbeidsplass blir kjenneteikna av ein tydeleg leiar som gir dei tilsette tillit og ansvar og tilsette som bidreg aktivt til eit triveleg miljø. Når du kjenner eigarskap til jobben din, opplever at innsatsen din betyr noko, og får bruke og utvikle kompetansen din, legg det grunnlaget for god helse og trivsel.

Tydeleg kommunikasjon er òg ein føresetnad for eit godt psykososialt miljø. Alle må vite kva som er venta i jobben, og alle treng klare tilbakemeldingar på arbeidet dei gjer. Ein god regel er å gi ros framfor andre og ta vanskelege samtalar på tomannshand.

Det er òg viktig at leiar og tilsette tek tak i eventuell ueinigheit og konfliktar med ein gong, slik at dei blir løyste mens dei enno er små. Uavklarte konfliktar gir eit dårleg arbeidsmiljø og kan skape helseplager, mens gode leiarar og støttande kollegaer fremmar god helse.

Dokumentasjon av HMS-arbeid

Både arbeidsmiljølova og internkontrollforskrifta krev at verksemder skal kunne dokumentere HMS-arbeidet skriftleg. Dokumentasjonen er beviset på at arbeidet med helse, miljø og sikkerheit faktisk blir gjennomført og følgt opp i kvardagen. Døme på slik dokumentasjon er sjekklister, avviksmeldingar, risikovurderingar og opplæringsbevis.

Det er likevel viktig å hugse på at papir eller digitale skjema åleine verken førebyggar skadar eller sjukdom. Det er dei praktiske tiltaka som betyr mest. Mindre verksemder bør derfor vektlegge enkle planar og skrive ned det som faktisk blir gjort, og kva for resultat dei oppnår. På den måten blir verksemda sine eigne behov for trygg drift varetekne, samtidig som kravet frå styresmaktene blir følgt.

Dokumentasjonen bør gjerast så enkel som mogleg og beskrive det de faktisk gjer på arbeidsplassen. Dette er avgjerande for å jobbe systematisk med HMS, og det er heilt avgjerande når Arbeidstilsynet kjem på tilsyn eller inspeksjon.

Arbeidstilsynet

Arbeidstilsynet er ein statleg etat som jobbar for at verksemder skal arbeide systematisk og førebyggande med sitt eige arbeidsmiljø. Dei gjennomfører både korte og lengre tilsyn med ulike tema. Å kontrollere verksemda sitt HMS-system er ein sentral del av eit slikt tilsyn.