Taale-baakoeh jïh adjektijvh
Taale-baakoeh
Joekehts taale-baakoeh gååvnesieh.
Maadth-taalh
Gihtjeme-baakoe: Gellie?
akte, göökte, golme, njieljie, vïjhte, ...
luhkieakte, luhkiegöökte, ... uktiseluhkie-uktsie
tjuetie (stoere-luhkie)
stoere-tjuetie (tåvsene)
Öörnege-taalh
Gihtjeme-baakoe: Gallede?
voestes, mubpie, gåalmede, njealjede, vïjhtede, ...
luhkie-voestes, luhkie-mubpie, ... uktsieluhkie-åktsede
tjuatede
stoere-tjuatede
Tjåenghkies-taalh
Dah tjåenghkies-taalh eah leah rïektes taale-baakoeh, daah goh substantijvh.
akth, göökth, golmh ... (gihtjeme-baakoe: Gellien aejkien?)
gööktesh, golmesh, ... (gihtjeme-baakoe: Gallesh? (almetjh mah ektesne))
gööktege, golmege, ... (gihtjeme-baakoe: Gallege? (bovtsh mah ektesne)
bielie, lehkie, gåalmahtasse (gåalmehts), ... (bröökh)
Adjektijvh
Adjektijve substantijvem buerkeste jïh soptseste guktie mij jallh gie lea, guktie vååjnoe, magkere dan klaerie, j.n.v.
Attributijve jïh predikatijve
Adjektijvi göökte hammoeh. Attributijve (attr.) mij substantijven åvtelen jïh predikatijve (pred.) mij substantijven minngelen.
gïemhpes (attr.)
gïemhpe (pred.)
Gellien aejkien adjektijvi attributijve-hammoeh minngie-gietjine -s, men adjektijvi predikatijve-hammoeh aaj muvhtene minngie-gietjine -s. Jeatjah aejkien adjektijven attributijve-hammoe seamma goh adjektijven predikatijve-hammoe.
Nuhtjh baakoe-gærjam viehkine jis ih daejrieh mah adjektijve-hammojde nuhtjedh.
galme tjaetsie (attr.), tjaetsie (lea) galmes (pred.)
noere baernie (attr.), baernie (lea) noere (pred.)
båeries almetje (attr.), almetje (lea) båeries (pred.)
tjeehpes bïenje (attr.), bïenje (lea) tjeehpes/tjååhpehke (pred.)
Positijve, komparatijve jïh superlatijve
Mijjieh maehtebe adjektijvide kompareeredh. Adjektijvi golme graadh jïh positijve dïhte maadth-graade. Dah göökte vielie graadh leah komparatijve jïh superlatijve.
Adjektijvi minngie-gietjie -be/-åbpoe komparatijvesne jïh -mes/-ommes superlatijvesne.
noere – nuerebe – nööremes
båeries – båarasåbpoe – båarasommes
Gosse göökte substantijvi gaskem viertiestidh dellie adjektijven komparatijvem nuhtjebe. Gosse jienebh goh göökte substantijvi gaskem viertiestidh dellie superlatijvem nuhtjebe.
Aanta nuerebe manneste.
Aehtjie båarasåbpoe tjidtjeste.
Saara nööremes mijjeste.
Aajja båarasommes dejstie.