Baakoe-klaassi bïjre
Baakoe-klaassh
Mijjieh baakojde baakoe-klaasside juekebe baakoej goerkesen, sojjehtimmien, seerkemen jïh åtnoen mietie.
Verbh
Verbh leah baakoeh mah soptsestieh maam gie jallh mij dorje, mij sjædta jallh ajve heannede. Verbi infinitijve-gietjie –dh.
båetedh, årrodh, ussjedidh, buaranidh
Substantijvh
Substantijvh leah nommh jallh lahtesh v.g. aatide, almetjidie, juvride, sijjide, mah dovne konkreete jïh abstrakte. Substantijvi minngie-gietjieh nominatijvesne –a, –e, –ie, –oe.
maana, bïenje, gåetie, faamoe, gaamege
Pronomenh
Pronomenem provhkebe jeatjah baakoen sijjeste, gellien aejkien substantijven sijjeste. Ovmessie pronomenh gååvnesieh.
manne, dohte, satne, jïjtje, gie
Taale-baakoeh
Taale-baakoeh leah maadth-taalh, öörnege-taalh jïh tjåenghkies-taalh.
akte, göökte, voestes, mubpie, gööktesh, golmege
Adjektijvh
Adjektijvh substantijvem buerkiestieh.
tjaebpies, veelkes, tjeelmehts, guhkebe
Adverbh
Adverbh jïjnjh ovmessie baakoeh. Adverbh soptsestieh gusnie, gåessie, guktie jallh man åvteste mij heannede jallh dorjesåvva, aaj soptsestæjjan mïelen bïjre.
ålkone, dallegh, varki, buerebe
Adposisjovnh
Adposisjovnh dovne postposisjovnh jïh preposisjovnh. Substantijven ektine dah aaj goh adverbh mah soptsestieh gusnie, gåessie, guktie jallh man åvteste mij heannede jallh dorjesåvva, aaj soptsestæjjan mïelen bïjre.
gåajkoe, åvtelen, bïjre, mietie
Konjunksjovnh
Konjunksjovnh baakoeh, raajese-lïhtsh jïh raajesh ektiedieh, juktie dah baalte-öörneldh sjidtieh.
jïh, jallh, vuj
Subjunksjovnh
Subjunksjovnh raajese-lïhtsh ektiedieh. Lïhtse-raajese aalka subjunksjovnine juktie raajese-lïhtse vuelie-lïhtsine sjædta bijjie-öörneldh raajesasse.
dellie, dle, gosse, jis
Interjeksjovnh
Interjeksjovnh leah baakoeh jallh jiehtegh mejtie almetje jeahta jallh tjåårve gosse geerjene jallh håjnan sjædta, gosse bååhpere jallh måarahtåvva.
Hijven!, Jemmede bielien!, Dellie haatjen!
Smaave baakoeh
Gellie baakoeh mah ovmessie tsiehkine åtnasuvvieh, gellie dejstie adverbh.
öövre, naa, jallan
gujht, badth, amma