Jeatjah baakoeh
Konjunksjovnh
Konjunksjovnh baakoeh, raajese-lïhtsh jïh raajesh ektiedieh, juktie dah baalte-öörneldh sjidtieh.
jïh
jallh/vuj
aaj
men, mohte
Konjunksjovnh baakoeh ektiedieh juktie dah baalte-öörneldh raajesisnie.
Aanta jïh Laara båetiejægan.
Aanta båata, Laara aaj.
Maahtah dallegh båetedh jallh vuertedh iehkiedasse.
Vïhtesjh! Båeries vuekien mietie gellien aejkien idtjin nuhtjh dam konjunksjovnem jïh. Konjunksjovnen bielelen naemhtie.
Næjlah Aantah (= Næjla jïh Aanta)
Aajjah aahkah (= Aajja jïh/gonnoeh aahka)
Månnoeh Saarah (= Manne jïh Saara)
Voejh laejpieh (= voeje jïh laejpie)
Subjunksjovnh
Subjunksjovnh raajese-lïhtsh ektiedieh. Lïhtse-raajese aalka subjunksjovnine juktie raajese-lïhtse vuelie-lïhtsine sjædta bijjie-öörneldh raajesasse.
dellie, die, dle
gosse
goh
gonnoeh, gon
juktie
guktie
ihke
jalhts
jis
mejtie
Subjunksjovnh lïhtse-raajesem åejvie-raajesasse viedtieh juktie dah göökte raajesh ektesne ellies raajesinie sjidtieh.
Vuertieh ånnetji juktie manne aaj jaksem.
Im daejrieh jis saatnan.
Interjeksjovnh
Interjeksjovnh leah baakoeh jallh jiehtegh mejtie gie jeahta jallh tjåårve gosse geerjene jallh håjnan sjædta, gosse bååhpere jallh måarahtåvva.
Aa!, Aah!
Geah!
Dellie maa!
Jemmede bielien!
Dellie haatjen!
Interjeksjovnh leah raajesen ålkolen goh jïjtje raajese-lïhtse.
Aah, dellie guarkam!
Jemmede bielien, man stoere sjïdteme!
Smaave baakoeh
Baakoeh gååvnesieh mah adverbh jïh vielie soptsestæjjan mïelen bïjre soptsestieh.
gænnah
bist
öövre
naa
ååpsen
jallan
sagke
mahte
Dah adverbh vielie soptsestieh guktie soptsestæjja ussjede jallh tuhtjie.
Im musihkem govlh, jallan govloe.
Destie manne öövre vïssjehtovveme.
Jeatjah smaave baakoeh
Baakoeh mejtie nuhtjebe, juktie vihkeles baakoeh raajesisnie tjuvtjiedidh.
gujht
gan/gænnah
goh
amma
ojhte
badth
hov
bist
Båatam gujht.
Ih goh datne sïjhth dåeriedidh?
Seamma badth.
Mujhtieh! Muvhth baakoeh, mej bïjre datne daelie lïereme, maehtebe joekehtslaakan nuhtjedh raajesisnie.