Skip to content
Lectures and Presentations

Guktie jurjehteminie

Her lærer du å følge instruksjoner når du lager mat, samt å gi instruksjoner til andre.
Bearkoe-gaamsoeh jïh kroenes-aath teellerhkesne. Guvvie.
Bearkoe-gaamsoeh jïh kroenes-aath teellerhkesne. Image: Espen Sjølingstad Hoen / CC BY-NC-SA 4.0

Daesnie lïerh:

Her lærer du

  • å beskrive hvordan mat lages

  • å lese en oppskrift

  • å følge en beskrivelse

Goltelh jïh lohkh soptsestallemem!

Bearkoegaamsoe-smeelegem jurjiehtidh

0:00
-0:00
Audio: Johan Martin Stenfjell, Nicklas Danielsen, Maria Kråik Stenfjell / CC BY-SA 4.0
Smeelegem bearkoe-gaamsojde jurjiehtidh

Laavvardahken dovne tjuatsa jïh beagka. Pïere olkese vaadtsa men varki bååstide båata.

Pïere: Man nåake vearelde! Ibie maehtieh vaeresne mïnnedh daan biejjien.

Sööfe: Dellie maehtebe ånnetji hæhtjosne öörnedh jïh sjiere gaskebiejjie-beapmoem jurjiehtidh.

Nejla: Dïhte gujht tryjjes sjædta. Buerebe ektesne beapmoeh jurjiehtidh goh oktegh.

Pïere: Saatnan. Manne miljneme-bearkoem veedtjem jïh gaerien sïjse bïejem. Sööfe, veedtjh gïhpem jïh munnieh.

Nejla: Manne löökem tjoehpem.

Pïere: Tjoehph smaave biehkieh!

Sööfe: Man gellie munnieh sïjhth?

Piere: Golme. Speelkesth munnide gaerien sïjse, dellie edtjem bearkojne pleentedh.

Sööfe: Man jïjnjem gïhpeste sïjhth?

Pïere: Aktem desilijhterem sïjhtem. Gurhkh gïhpem gaerien sïjse mearan manne sjåavoem.

Nejla: Daesnie saelhtie jïh peara-jaavvoe.

Pïere: Göökte busth åadtjoem?

Nejla: Duelie! Peehperh daelie sïjhth?

Pïere: Jaavoe. Aahka jeehti ohtje peehperh. Men man jïjnje lea ohtje?

Sööfe: Manne vïenhtem bustetjem peehperistie nuekies.

Pïere: Dellie smeelege gaervies!

Goltelh jïh lohkh

Pïere, Sööfe jïh Nejla smaave jorpe bearkoe-gaamsoeh darjoeh jïh gaamsojde bisseme-plååtese biejieh. Vuebnie edtja 180 graderh baahkes årrodh. Dah edtjieh bearkoe-gaamsojde bielie tæjmoem vuebnesne bissedh. Mearan vuertieminie vuebnie baahkene, dellie Nejla njeerveme-pearam jurjehte. Sööfe buertiem dyöle jïh Pïere kroenes-aath tjuahpa.

Njeerveme pearah veelkes feetesne. Guvvie.
Njeerveme pearah. Image: Synnøve Dreyer / CC BY-NC-ND 4.0

Lohkh

Nejla Pïerese bïhkede guktie njeerveme-pearam jurjiehtidh.

Goltelh maam Nejla Pïerese jeahta jïh tjaelieh maam Pïere njeerveme-pearese daarpesje!

Gosse golme almetjh, dellie daarpesjh:

8 pearah

1,5 dl mielhkeste

1,5 buste voejeste

0,5 bustetje saelhteste

0,5 bustetje peehperistie

Ohtje muskaath

Pearam skeelijinie skeeleminie. Guvvie.
Image: FoodFoto Köln / CC BY-NC-SA 4.0

Goltelh jïh lohkh

Goltelh jïh lohkh maam Nejla bïhkede guktie Pïere edtja darjodh!

Naemhtie njeerveme-pearam jurjehth

0:00
-0:00
Audio: Johan Martin Stenfjell / CC BY-SA 4.0
Naemhtie njeerveme-pearam jurjehth

Skeelh pearah.

Doelth tjaetsiem voessjeme-lihtesne.

Bïejh pearah tjaetsien sïjse, men ij saelhtiem annje.

Voessjh pearah goske mïevhkes sjidtieh.

Gurkh tjaetsiem voessjeme-lihteste.

Bahkedh mielhkiem.

Njeervh pearah.

Sjåavoeh voejem jïh mielhkiem njeerveme-pearan sïjse.

Bïejh peehperem, saelhtiem jïh muskaath njeerveme-pearan sïjse.

Mujhtieh smååhkedh, juktie kaanne daarpesjh vaenebe goh bielie bustetjem peehperistie jïh saelhteste.

Salate gaeresne. Guvvie.
Salaate. Image: Maria Kråik Stenfjell / CC BY-SA 4.0

Goltelh

Goltelh soptsestallemem "Kroenes-aath"!

Sööfe, maam bööremes lyjhkh

0:00
-0:00
Audio: Johan Martin Stenfjell, Nicklas Danielsen, Maria Kråik Stenfjell / CC BY-SA 4.0
Kroenes-aath

Pïere: Sööfe, maam bööremes lyjhkh, voessjeme viskes-roehtsh vuj njoetske viskes-roehtsh?

Sööfe: Manne bööremes njoetske viskes-roehtsh lyjhkem.

Pïere: Nååts datne Nejla?

Nejla: Seamma-sahth munnjien.

Pïere: Åkej, dellie im dejtie voessjh. Manne dejtie ajve tjoehpem, jïh salaatem öörnem.

Sööfe: Hijven!