Gosse baakoeh fååtesieh
Daaletje seabradahkesne jïjnjh baakoeh mah fååtesieh juktie orre aamhtesi bïjre soptsestidh jïh tjaeledh. Gellien aejkien gåarede baakoeh jeatjah saemien baakojste seerkedh. Vuesiehtimmien gaavhtan, jis daaroen baakoem produkt daarpesjibie, maam baakojde dellie veeljebe? Edtjebe lööneme-baakoem produkte veeljedh, jallh orre seerkeme-baakoem dellie buerebe darjodh?
Seerkeme-baakoeh
Produkte lea mij akt mij dorjesåvva, saemien-gïelesne maadth-verbeste darjodh. Jis mijjieh substantijvem dehtie verbeste darjodh seerkebe, minngie-gietjine -me, dellie baakoem darjome åadtjobe mij daaroen-gïelesne gjøremål. Produkte lea dïhte maam gie dorjeme juktie doekedh. Jis minngie-gietjiem -se lissehtibie dellie orre baakoem seerkebe, dorjese, mij daaroen-gïelesne produkt.
Seammalaakan dej daaroen baakoejgujmie tjeneste jïh tilbud. Dïenesje, daaroen-gïelesne tjeneste maehtebe seerkedh verbeste dïenesjidh daaroen-gïelesne tjene. Faalenasse, daaroen-gïelesne tilbud, maehtebe verbeste faalenidh bli tilbudt seerkedh jalhts verbe ij saemien baakoegærjine gååvnesh. Jïh daate verbe jis maadth-verbeste faaledh tilby seerkesovveme.
Lööneme-baakoeh
Gosse eah sjiehteles saemien baakoeh gååvnesh, dellie gellien aejkien tjoerebe jeatjah baakoejgujmie maam jiehtedh mah saemien gïelese buerebe sjiehtieh.
Muvhten aejkien öövre geerve naan sjiehteles baakoem gaavnedh. Juktie soptsestæjjah, goltelæjjah jallh lohkijh edtjieh sinsitniem aelhkieslaakan guarkadidh, dellie kaanne buerebe baakoem daaroen-gïeleste löönedh goh lööneme-baakoem.
Mijjieh tjoerebe iktegisth ussjedidh, mah baakoeh bööremes provhkedh. Jis mijjieh dan jïjnjh ammes baakoeh löönebe, guktie dellie minngemes sjædta, dellie mijjen gïele vielie tjïelke saemien-gïele?