Njuike sisdollui
Fágaartihkal

Gie «manne» tjaalegisnie?

Dovne tjiehpieslidteratuvren-tjaalegh jïh aamhtese-tjaalegh maehtieh persovneles årrodh. «Manne» aktene aamhtese-tjaalegisnie lea iktegisth akte rïektes almetje, dïhte guhte tjaalegem tjaaleme.
Nïejte, baernie, sarve, bovtse, råate, snöölhke, bïerne, aarhtse, åeruve, riepie, giehke, bïenje, njåemele, vetneme. Guvvie.
Govva: Nils P. Joma / CC BY-NC-SA 4.0

Tjaeleme-råålla

Gosse reakedsbiejjie-heelsegh tjaelebe dellie tjoerebe persovneles årrodh. Gosse mijjieh artihkelem jïh referaatem tjaelebe dellie tjoerebe ov-persovneles aamhtese-gïelem nuhtjedh. Sjangere soptseste guktie tjaelije tjuara tjaeledh, jis tjaelije maahta våajnoes årrodh tjaalegisnie. Gosse edtjebe håalodh jallh tjaeledh dellie sjangere tjaeleme-råållam jïh soptsestimmie-vuekieh tjaeliejasse vadta.

«Manne» aamhtese-tjaaleginie jïh tjiehpieslidteratuvren-tjaaleginie

Bïevnese. Guvvie.
Govva: Liv Karin Joma / CC BY-SA 4.0

Gosse tjaelije baakoem «manne» aamhtese-tjaalegisnie tjaala, dellie daejrebe tjaelije jïjtje soptseste. Ij leah naemhtie tjiehpieslidteratuvren-tjaalegisnie. Akte tjiehpies-lidteratuvre tjaelije aktem orre veartenem skaepede, gusnie ij jïjtje jielieh. Dïhte soptsesem hæhtede. Jis akte «manne» fiksjovne-tjaalegisnie dellie daejrebe ij leah tjaelije, men akte gaagkoe tjaalegisnie mij soptseste. Gosse fiksjovnem tjaelebe dellie maehtebe fantasijem nuhtjedh.