Guktie jurjehteminie

1. Goltelh jïh lohkh

Smeelegem bearkoe-gaamsojde jurjiehtidh

Laavvardahken dovne tjuatsa jïh beagka. Pïere olkese vaadtsa men varki bååstide båata.

Pïere: Man nåake vearelde! Ibie maehtieh vaeresne mïnnedh daan biejjien.

Sööfe: Dellie maehtebe ånnetji hæhtjosne öörnedh jïh sjiere gaskebiejjie-beapmoem jurjiehtidh.

Nejla: Dïhte gujht tryjjes sjædta. Buerebe ektesne beapmoeh jurjiehtidh goh oktegh.

Pïere: Saatnan. Manne miljneme-bearkoem veedtjem jïh gaerien sïjse bïejem. Sööfe, veedtjh gïhpem jïh munnieh.

Nejla: Manne löökem tjoehpem.

Pïere: Tjoehph smaave biehkieh!

Sööfe: Man gellie munnieh sïjhth?

Piere: Golme. Speelkesth munnide gaerien sïjse, dellie edtjem bearkojne pleentedh.

Sööfe: Man jïjnjem gïhpeste sïjhth?

Pïere: Aktem desilijhterem sïjhtem. Gurhkh gïhpem gaerien sïjse mearan manne sjåavoem.

Nejla: Daesnie saelhtie jïh peara-jaavvoe.

Pïere: Göökte busth åadtjoem?

Nejla: Duelie! Peehperh daelie sïjhth?

Pïere: Jaavoe. Aahka jeehti ohtje peehperh. Men man jïjnje lea ohtje?

Sööfe: Manne vïenhtem bustetjem peehperistie nuekies.

Pïere: Dellie smeelege gaervies.

2. Darjoeh laavenjasside

3. Lohkh

Pïere, Sööfe jïh Nejla smaave jorpe bearkoe-gaamsoeh darjoeh jïh gaamsojde bisseme-plååtese biejieh. Vuebnie edtja 180 graderh baahkes årrodh. Dah edtjieh bearkoe-gaamsojde bielie tæjmoem vuebnesne bissedh. Mearan vuertieminie vuebnie baahkene, dellie Nejla njeerveme-pearam jurjehte. Sööfe buertiem dyöle jïh Pïere kroenes-aath tjuahpa.

4. Lohkh

Nejla Pïerese bïhkede guktie njeerveme-pearam jurjiehtidh.

Goltelh maam Nejla Pïerese jeahta jïh tjaelieh maam Pïere njeerveme-pearese daarpesje!

5. Goltelh jïh lohkh

Goltelh jïh lohkh maam Nejla bïhkede guktie Pïere edtja darjodh.

Naemhtie njeerveme-pearam jurjehth

Skeelh pearah.

Doelth tjaetsiem voessjeme-lihtesne.

Bïejh pearah tjaetsien sïjse, men ij saelhtiem annje.

Voessjh pearah goske mïevhkes sjidtieh.

Gurkh tjaetsiem voessjeme-lihteste.

Bahkedh mielhkiem.

Njeervh pearah.

Sjåavoeh voejem jïh mielhkiem njeerveme-pearan sïjse.

Bïejh peehperem, saelhtiem jïh muskaath njeerveme-pearan sïjse.

Mujhtieh smååhkedh, juktie kaanne daarpesjh vaenebe goh bielie bustetjem peehperistie jïh saelhteste.

6. Goltelh jïh lohkh

Kroenes-aath

Pïere: Sööfe, maam bööremes lyjhkh, voessjeme viskes-roehtsh vuj njoetske viskes-roehtsh?

Sööfe: Manne bööremes njoetske viskes-roehtsh lyjhkem.

Pïere: Nååts datne Nejla?

Nejla: Seamma-sahth munnjien.

Pïere: Åkej, dellie im dejtie voessjh. Manne dejtie ajve tjoehpem, jïh salaatem öörnem.

Sööfe: Hijven!

7. Goltelh jïh darjoeh laavenjasside

Beapmoeh leah dallah gaervies. Dah edtjieh bearkoe-gaamsoeh, njeerveme-pearam jïh tjoehpeme viskes-roehtsh byöpmedidh. Lissine edtjieh jokngh utnedh jïh tjaetsiem jovkedh. Sööfe jokngh smaave gaerien sïjse beaja jïh tjaetsiem gaatnoen sïjse gurkie. Dellie buertiem dyöle.