Beskriving av oppdraget
1: Vel berekraftsmål
De har fått i oppdrag å utvikle ein nettstad som set søkjelys på eitt av FNs berekraftsmål. Kva for eit av måla de vil jobbe med, vel de sjølve.
Les meir på FNs nettside om berekraftsmåla.
2: Kva vil du? Bruk retoriske verkemiddel
Nettstaden de skal utforme, skal innehalde informasjon om berekraftsmålet. Det skal også påverke brukarane til å gjere noko for å nå berekraftsmålet.
Korleis de går fram for å påverke brukarane, er heilt opp til dykk, men de må velje ei hovudappellform for bodskapen: etos, logos eller patos. Valet av retoriske verkemiddel bør påverke både innhaldet og stilen på nettstaden.
Artikkel: Retorikk i media og i medieuttrykk
Artikkel: Etos, logos og patos
3: Målgruppa er trendy unge vaksne
Målgruppa de ønskjer å treffe, er unge vaksne som er opptekne av mote og trendar. Dei følgjer med på kva som skjer i designbransjen, og lèt seg begeistre av tidsriktige og trendy kampanjar.
4: Gjer grundig research
De er oppfordra til å gjere research og studere dagsaktuelle trendar innan grafisk design. Finn éin eller fleire stilar som kan passe målgruppa, appellforma og bodskapen dykkar. Diskuter dykk fram til kva stil som vil passe best.
Hugseliste
Bestem kva berekraftsmål de vil jobbe med.
Vel kva appellform de hovudsakleg vil bruke.
Bestem innhaldet på nettstaden. Kva skal de seie, og kor mykje stoff treng de for å seie det?
Set opp strukturen til nettstaden. Kva menyval og undersider treng de? Kva innhald skal de plassere kvar? Lag eit strukturkart for alle sidene på nettstaden.
Skriv tekstane de treng.
Studer dagsaktuelle stilar og bestem dykk for ein stil. Lag ein liten designmanual som beskriv stilen de vel, og reglar for bruk av fargar og fontar.
Teikn blueprints, altså grove oversiktsskisser, som viser bruken av stilen de har definert i designmanualen. Gjer dette for alle sidene på nettstaden. Hugs å følgje konvensjonar for nettdesign.
Skaff eller produser bilete og illustrasjonar.
Set opp nettstaden i ein app for prototyping, til dømes Adobe XD.
Test løysinga, gjer forbetringar og lever resultatet.