Faget naturbasert næringsaktivitet er utvikla i tråd med fagfornyinga 2020. Vi har teke utgangspunkt i både overordna og fagspesifikk del av læreplanen: kompetansemål, skildring av fagrelevans og sentrale verdiar, kjerneelement, tverrfaglege tema og grunnleggande ferdigheiter.
Korleis finne fram i faget?
Når du går inn på utdanningsprogrammet naturbruk på hovudsida til NDLA, får du opp ein inngang for kvart enkelt programfag på vg1. Klikkar du deg inn på eit programfag, får du opp ei oversikt over emna i det aktuelle faget.
Går du inn i eit emne, finn du ei opplisting av fagartiklar og oppgåver som høyrer til emnet. Nokre av emna er delte opp i underemne. Då vil du finne artiklar og oppgåver når du klikkar deg vidare til dei enkelte underemna.
Øvst til venstre på kvar side finn du ein knapp med knappeteksten "Innhald". Til høgre for innhaldsknappen finn du språkveljaren og søkefunksjonen. Klikkar du på innhaldsknappen, får du ei menyoversikt over heile faget. Mange liker å bruke denne for å få oversikt over emna. Språkveljaren lar deg velje bokmåls- eller nynorskversjon av innhaldet, og søkefunksjonen kan du bruke til søk i faget og på heile ndla.no.
Det er òg mogleg å søke og sortere innhald etter kompetansemål. Det gjer du enklast ved å gå inn på fagframsida og klikke på det vesle ikonet "Vis kompetansemål" som er plassert rett under namnet på faget. Dette er ein funksjon vi tilrår å bruke for å finne aktuelt innhald.
Når du er inne i ein fagressurs, kan du velje "Vis kompetansemål" for å få opp korleis ressursen er kopla til læreplanen.
Innhald
I faget finn du fagartiklar, filmar og utforskande og yrkesretta oppgåver. Her må du velje ut ressursar som passar til elevgruppa og til årsplanen til skulen. Naturbruksskulane i Noreg er veldig ulike med ulikt naturgrunnlag i nærområdet sitt og med ulike naturbruksnæringar som det blir tilbode praksis i. Noko av fagstoffet er meint å vere grunnleggande for alle, mens anna fagstoff vil variere etter kva slags naturbruksproduksjon skulen har øvingar i.
Om dei ulike emna i faget
Naturgrunnlaget gir grunnleggande kunnskap om naturen som utgangspunktet for naturbruksnæringane i Noreg og er sterkt forankra i kjerneelementet "berekraftig bruk av natur".
Emnet Delta i samfunnsdebatten! dekker kompetansemålet om deltaking i samfunnsdebatten som profesjonell yrkesutøvar. Her er det mange ressursar om aktuelle problemstillingar rundt naturbruksnæringane og forvalting av naturressursar.
I mange av naturbruksyrka er det arbeidsoppgåver som blir utførte utandørs uavhengig av vêr og føre. Å kunne kle seg rett og vareta sikkerheita til seg sjølv og andre er viktig for å kunne gjere ein god jobb. I emnet Å jobbe ute er det ressursar om kart, kompass og GPS, påkleding og korleis ein ferdast på ein sikker måte.
Garden som arena for omsorg, læring og opplevingar handlar om korleis det kan utviklast tilleggsnæring på garden.
Naturbasert reiseliv og aktivitet handlar om å bli kjend med ulike naturbaserte aktivitetar og lære å utføre aktivitetar ute. Skal vi tilby opplevingar for andre, må vi kunne gjennomføre aktivitetane på ein sikker måte.
Førstehjelp inneheld filmar og oppgåver om mange tema innan førstehjelp. Ressursane er laga felles for fleire yrkesfag på NDLA.
Yrke innan naturbruk dekker kompetansemålet om å kunne beskrive ulike yrke innan naturbruk. Her er det yrkesportrett av alle naturbruksyrka og ressursar om det å velje yrke. Ressursane vil òg vere nyttige i samband med rettleiing av tiandeklassingar i utdanningsval.
Å starte eiga bedrift har ressursar som dekker ulike mål om næringsutvikling. Desse kan til dømes vere aktuelle ved bruk av elevbedrift.
Dokumentasjon og kvalitet inneheld malar for skriving av risikoanalyse, logg, dokumentasjonsverktøy og rapportar.
På tvers av fag
Dei to programfaga i naturbruk vg1 er knytte tett saman. Fleire av ressursane er merkte med kompetansemål på tvers av programfaga. Vi har valt å legge emnet Naturgrunnlaget i begge faga sidan naturressursane er utgangspunktet i begge fag.
Du kan òg la elevane jobbe med problemstillingar dei kan finne svar på ved å bruke ressursar frå fleire fag. Vi har samla fleire slike problemstillingar og casar i eit eige fag: Tverrfaglege tema. Det er fleire casar her som er svært aktuelle å jobbe med i samarbeid med fellesfag, til dømes mennesket sitt forhold til naturen og klimaendringar.
Naturfag og programfaga på vg1 naturbruk har nokre samanfallande mål, og her kan det vere aktuelt med samarbeid mellom faga.
Støtte til læringsarbeid og planlegging
Metodane og tilnærmingane som er beskrivne i overordna del, gjeld alle fag, og det har vi i NDLA teke på alvor. Vi har derfor laga eit eige "fag" som vi kallar Verktøykassa. Der ligg det ressursar for elevar som kan vere nyttige i læringsarbeidet, og ressursar for lærarar som kan komme godt med i planlegging av undervisning.
Film
Naturbruk har ein del filmar som inngår i fagressursane. I tillegg minner vi om NDLA film. Her finn du dokumentarar, spelefilmar og undervisningsfilmar sorterte etter emne.
Innspel og dialog
Vi ønsker å ha dialog med brukarane våre. Kom gjerne med innspel i Facebookgruppa NDLA naturbruk. Du kan òg bruke knappen "Spør NDLA" nedst på sidene våre dersom du har spørsmål eller innspel til innhaldet.