Kva produserer vi i veksthusa våre?
Kva produserer vi i norske veksthus?
Nesten 82 prosent av veksthusarealet i Noreg blir brukt til produksjon av veksthusgrønsaker og prydplanter. Av grønsaker er det tomat og agurk som er dei to store produksjonane, men salat og krydderurter blir òg dyrka i stort omfang.
Prydplanter omfattar både snittblomstrar, som til dømes krysantemum, potteplanter, som julestjerne, og den gruppa vi omtaler som utplantingsplanter. Utplantingsplanter omfattar alt vi planter i urner og balkongkassar på våren, til dømes stemor, superpetunia, fløyelsblomstrar og mange fleire.
Produksjon | Produksjonsverdi, mill. kroner |
|---|---|
| Tomat | 548 |
| Agurk | 611 |
| Andre grønsaker (salat, urter m.fl.) | 415 |
| Potteplanter | 472 |
| Snittblomstrar | 203 |
| Utplantingsplanter | 413 |
(Kjelde: S. Bøckman, Norsk Gartnerforbund, personleg kommunikasjon, 8. mars 2024)
Kvar i Noreg har vi veksthus?
Alle fylke i Noreg har veksthusproduksjon, men det er Rogaland og Oslo og Viken som er dei store veksthusfylka. Her finn vi godt over halvparten av alt veksthusarealet.
Frå små til store veksthus
Vi bygger stadig større veksthus. Det totale veksthusarealet i Noreg har vore ganske stabilt frå 1979 og fram til i dag, men mange små hus har blitt erstatta av få store. No består omkring 75 prosent av alt veksthusarealet i Noreg av hus som er 5000 m2 eller større. I 1979 var berre litt over 20 prosent så store.
Kjelde
Statistisk sentralbyrå. (2021, 15. desember). Landbruksteljing. 13473: Jordbruksbedrifter med veksthus og veksthusareal, etter størrelsen på veksthusarealet (F) 1979–2020. https://www.ssb.no/statbank/table/13473