Småfe er sau og geit. Saueproduksjon finn vi over nesten heile landet, mens det er mest geiter på Vestlandet og i Nordland og Troms. Vi har mange ulike sauerasar i Noreg, men den vanlegaste geiterasen er norsk mjølkegeit. Saueproduksjon gir oss ull og kjøtt. Av geitene får vi mjølk, kjøtt og skinn.

Vi har mange ulike sauerasar i Noreg, og i saueproduksjonen er det kjøtt og ull som skal gi bonden inntekter. Gjennom vinteren er dei fleste sauane inne i fjøset, men etter lamminga om våren og fram til hausten er dei ute på beite.

Sauar er drøvtyggarar, og vi må passe på at mikroorganismane i vomma får det dei treng for å kunne fungere som dei skal. Surfôr og høy er det viktigaste fôret gjennom vinteren, og om sommaren hentar dei fleste sauane fôret sitt på beite i utmarka. I periodar treng dei òg kraftfôr og mineraltilskot.