Potet er ei av dei viktigaste matplantene i verda. I Noreg blir ho dyrka over heile landet, nokon dyrkar i ein pallekarm, andre har potetdyrking som leveveg. I dette emnet lærer du at du må planlegge godt, følge godt med gjennom vekstsesongen og ha ein plan for hausting og lagring for å lykkast.

Poteta betra den norske folkehelsa betydeleg då ho kom til Noreg i tiåra før 1800. Ho var på mange måtar livreddande. Etter dette og fram til i dag har poteta vore heilt sentral i det norske kosthaldet, men no er den tradisjonelle kokte poteta i ferd med å forsvinne frå middagsbordet.