Oppgåve 1. Å skrive til mottakaren
Nav har kontakt med mange menneske kvar dag, og mykje av kommunikasjonen går føre seg skriftleg. Dessverre har dei ikkje alltid hatt mottakaren i fokus. Under er eit døme på korleis misforståing mellom avsendar og mottakar (med ein omsetjingsapp i midten) gjorde at ein familie trudde Nav skulle drepe dei.
NRK: Familie trodde Nav skulle drepe dem
Les artikkelen og skriv ei kort beskriving av kva problemet til Nav var, og kva som var tiltaka deira for å forbetre situasjonen.
Oppgåve 2. Søknad om stilling
Under ser du starten på ein jobbsøknad som er vanskeleg å lese og sårt treng språkhjelp. Gå gjennom teksten og prøv å gjere han lettare å lese og meir passande for ein jobbsøknad.
Eg har sett jobbannonsen dykkar på finn.no og vil med denne søknaden uttrykkje ønsket mitt om å bli vurdert til stillinga de i Korreliz AS har lyst ut som juniormedarbeidar i den nye kommunikasjonsavdelinga som er i etableringsfasen i Stavanger. Eg har to års erfaring innan området med opparbeiding av gode evner i Photoshop, Premiere og Indesign og har ei genuin interesse for arbeidsfeltet. Hovudsakleg er fast stilling å føretrekkje, men å starte i ei mellombels stilling kan òg vere interessant. Vedlagt er min curriculum vitae.
Oppgåve 3. Svar på garantisak
Under ser du starten på eit avslag til ei garantisak. Denne teksten vil ikkje vere enkel å forstå for ein vanleg person. Gå gjennom og tilpass slik at teksten er forståeleg.
God dag Annette.
Takk for at du tok kontakt med oss, vi håper å kunne hjelpe deg i denne saka. Basert på samanstillinga di av hendingsgangen er det ikkje usannsynleg at handteringa av produktet kan ha vore medverkande til skadeførekomsten. Kjøpslova § 31 krev at kjøpar skal så snart han etter forholda har rimeleg høve til det, undersøkje gjenstanden slik god skikk tilseier. Sidan førespurnaden din kjem ein lengre tidsperiode etter vare innkjøp forvanskar dette situasjonen. Dette kombinert med at vi går ut frå at det ikkje er ein ubetydeleg risiko for at dette er tilfelle kan vi ikkje med godt samvit godkjenne søknaden din.
Oppgåve 4. Refleksjon
Dei to tekstane i oppgåve 2 og 3 hadde ulike svakheiter. List opp dei ulike typane svakheiter du fann, og vurder kva typar som var mest skadelege for at tekstane skulle vere tydelege og godt forståelege.
Relatert innhald
Nettside hos sprakradet.no