Utstyr
foto av rommet du skal lage innreiingsforslag til
kalkerpapir er eit delvis gjennomsiktig teiknepapir. Det kan leggjast over eit motiv du vil kopiere linje for linje.
teikneblyant, viskelêr, fargeblyantar og tusj
Tracing med foto som utgangspunkt
Med foto som utgangspunkt kan du leggje kalkerpapir over biletet og teikne inn alle linjer du ser. Bruk blyant slik at du kan viske bort linjer som kjem i vegen for møblar og interiørobjekt du vil bruke i rommet.
Når du har fått opp rommet, teiknar du inn møblar og anna som kan passe. Lag så god skisse du klarer, og legg til element som kan få rommet til å sjå finare ut. Fargelegg med fargeblyant eller tusj som er berekna for kalkerpapir.
Oppgåve
Finn eit rom eller miljø som har potensiale. Det kan vere kva som helst rom eller miljø. Du kan velje eit rom heime som du fotograferer, eit rom du finn på nettet eller i eit magasin, eller eit miljø frå ein møbelbutikk.
Bruk kalkerpapir (gjennomsiktige ark) og lag ei skisse for hand av rommet eller miljøet ditt.
Lag så fin skisse du klarer, bruk linjal dersom du vil ha eit stramt uttrykk, eller handteikna strek dersom du vil ha eit meir skisseaktig preg.
Tenk deg til korleis rommet skal sjå ut når det er ferdig, og teikn opp det som trengst for å få det slik du har tenkt. Bruk magasin eller nettsider for å finne det du vil innreie med. Pass på at storleikane ser naturlege ut i rommet.
Fargelegg med fargeblyant eller tusj.