Megatrendar
Når vi snakkar om trendar, dekkjer omgrepet oftast mindre åtferdsendringar som er meir interessante for dei som skal utvikle nye produkt, enn for dei som ønskjer å analysere dei store endringane i samfunnet. Ein megatrend blir forklart av John Naisbitt som «store sosiale, økonomiske, politiske og teknologiske endringar som skjer sakte, men sikkert».
Ein av dei fremste trendforskarane i verda er John Naisbitt, som saman med Patricia Aburdene skreiv bøkene Megatrends og Megatrends 2000. I 1982 beskreiv dei ti megatrendar som dei meinte ville påverke oss i eit hundreårsperspektiv:
- frå det industrielle samfunnet – til informasjonssamfunnet
- frå tvungen teknologi – til høgteknologi / høg «touch»
- frå nasjonalt basert økonomi – til verdsbasert økonomi
- frå kort tidsperspektiv – til langt tidsperspektiv
- frå sentralisering – til desentralisering
- frå institusjonell hjelp – til sjølvhjelp
- frå representativt demokrati – til deltakardemokrati
- frå hierarki – til nettverkssamarbeid
- frå «nord» – til «sør»
- frå anten–eller – til fleire moglegheiter
Fleire av desse megatrendane er relevante når vi analyserer utviklinga. I teknologisk samanheng er det veldig lenge sidan 1982. Samtidig er det lett å sjå at John Naisbitt og Patricia Aburdene trefte godt då dei beskreiv mykje av det som allereie kjenneteiknar dei viktigaste trendane i dag.
Kjelde
Naisbitt, J. (1982). Megatrends – The New Directions Transforming Our Lives. New York: Grand Central Publishing.