Servitøren må ha brei kunnskap om alt frå å klargjere restauranten til servering og kunnskap om mat og drikkevarer. Det er viktig at gjesten får ein god harmoni i måltidet, og ei god totaloppleving av oppdekking, servering og service. Drikka må ikkje overdøve maten, og heller ikkje omvendt.

Drikke nyt vi anten åleine eller saman med mat. Det finst tallause typar drikke, som er knytte til forskjellige kulturar, område og land. Varm drikke, kald drikke, temperert drikke – skilnadene er mange. I dette emnet tek vi for oss likskapane og skilnadene mellom dei ulike typane drikkevarer.

På alle plassar og arrangement der det blir selt alkohol, skal gjesten alltid ha tilbod om alkoholfrie alternativ. Det finst i dag eit breidt utval av alkoholfrie drikkar på marknaden. Mange småskalaprodusentar i Noreg sel gode produkt som er laga på lokale råvarer.