Øving

Kva for typar verb har vi?

Lær om regelrette og uregelrette verb, hjelpeverb og hovudverb.

Regelrette og uregelrette verb

Vi deler verba inn i to grupper etter måten dei blir bøygde på: regelrette (svake) verb og uregelrette (sterke) verb.

Regelrette verb

Regelrette verb har (nesten alltid) same stammevokal i alle verbtider. I eksempelverba nedanfor er stammevokalen utheva:

Infinitiv	Presens	Preteritum	Presens perfektum
(zu) hören	(er, sie, es) hört	(er, sie, es) hörte	(er, sie, es) hat gehört
(zu) lernen	(er, sie, es) lernt	(er, sie, es) lernte	(er, sie, es) hat gelernt

Uregelrette verb

Uregelrette verb har skiftande stammevokal i dei ulike verbtidene. I eksempelverba nedanfor er stammevokalen utheva:

Infinitiv	Presens	Preteritum	Presens perfektum
(zu) singen	(er, sie, es) singt	(er, sie, es) sang	(er, sie, es) hat gesungen
(zu) schreiben	(er, sie, es) schreibt	(er, sie, es) schrieb	(er, sie, es) hat geschrieben
(zu) fahren	(er, sie, es) fährt	(er, sie, es) fuhr	(er, sie, es) ist gefahren

Øving 1: Regelrette og uregelrette verb

Hören, lernen, singen, schreiben: Omsett verba til norsk og bøy dei a verbo.
Også i norsk har vi regelrette og uregelrette verb. Ta for deg verba å høyre, å lære, å synge og å skrive. Kva for verb er regelrette og uregelrette? Kan du forklare kvifor?

Svar

Spørsmål a)

å høyre – høyrer – høyrde – har høyrt
å lære – lærer – lærte – har lært
å synge – syng – song – har sunge
å skrive – skriv – skreiv – har skrive

Spørsmål b)

Høyre og lære er regelrette verb, synge og skrive er uregelrette verb.
Vi kan bruke den same forklaringa som for tyske verb: Regelrette verb får same stammevokal i alle tider, uregelrette verb skiftar stammevokal (i nokre eller i alle tider).

Hjelpeverb og hovudverb

Det finst berre nokre få hjelpeverb. Dei viktigaste er ha, vere, bli, verte, kunne, skulle, ville, måtte og burde.
Hjelpeverba “hjelper” hovudverbet med å danne verbal i setninga:
Du må lære. Han vil skrive. Vi blir høyrde.
Hovudverbet ber tydinga: lære, skrive, høyre osv.

Øving 2: Hjelpeverb og hovudverb

Temporale hjelpeverb (tidshjelpeverb)

Vi bruker tidshjelpeverb for å danne dei samansette tidene av verbet, som presens futurum og presens perfektum. Dei tyske tidshjelpeverba er sein, haben og werden:

Tysk	Norsk	Verbtid
Wir werden umziehen.	Vi skal flytte. Vi kjem til å flytte.	Presens futurum
Alle haben gegessen.	Alle har ete.	Presens perfektum
Sie sind nach Hause gegangen.	Dei er/har gått heim.	Presens perfektum

Modale hjelpeverb

Modale hjelpeverb uttrykker ulike haldningar til det som skal gjerast:

Tysk	Norsk	Haldning
Ich muss diesen Text schreiben.	Eg må skrive denne teksten.	tvang, plikt
Er will diesen Text schreiben.	Han vil skrive denne teksten.	ønske eller krav om noko
Du kannst diesen Text schreiben.	Du kan skrive denne teksten.	tillating evne, ferdigheit

Passivdannande hjelpeverb

For å lage passiv bruker vi i nynorsk hjelpeverba bli eller verte, på tysk werden:

Das Brot wird gebacken. Brødet blir/vert bakt.

Hovudverb + hjelpeverb = verbal

I setninga Ich muss heute lernen finn vi to verbformer: muss og lernen.
Verbet lernen fortel oss kva som skjer og er derfor hovudverbet i setninga.
Men lernen er også ein infinitiv, og ein infinitiv kan ikkje danne verbal aleine i ei setning fordi han er ei infinitt (ubøygd) verbform. Infinitiven må stå saman med ei bøygd verbform.
Det er hjelpeverbet muss som er den bøygde verbforma i setninga (muss er her tredje person eintal presens av verbet müssen).
Muss lernen er verbalet i setninga. Vi seier at verbalet er samansett.