Annonse, radiospot og reklamefilm

Format og sjangrar er tilpassa den kanalen reklamen skal formidlast gjennom. Annonsar i aviser og magasin består av bilete og skrift. Nettannonsar kan òg innehalde levande bilete. Radiospotar er reklame i lydformat for radio, anten det er vanleg radio eller radio og podkast strøymd frå nett. Reklamefilmar blir viste på fjernsyn, kino, i nettavisar eller i sosiale medium.

Inntektene frå reklame sikrar jobbane til dei som arbeider i reklamebransjen. Men for mange mediebedrifter er inntekter frå reklameverksemd òg eit viktig tilskot for redaksjonell verksemd.

Ei annonse er ein betalt bodskap som blir gitt att i ei trykksak eller i eit nettbasert medium. Det er vanleg å skilje mellom reklameannonsar, salsannonsar og kunngjeringar. Ein salsannonse skal selje varer og tenester. Stillingsannonser og dødsannonser er ikkje reklame, dei er kunngjeringar.

På Google og i sosiale medium blir annonsar skreddarsydde for brukarprofilen din. Ein brukarprofil er basert på den informasjonen du over tid har delt med andre på internett. Har du til dømes vore innom ein nettbutikk eller søkt etter ei vare på Google, kan du få annonsar frå leverandører av slike produkt i vekevis etterpå.

Elles finn vi annonsestoff dei i regionale abonnementsavisene, som Nordlys, Adresseavisen og Agderposten, på nett og på papir. Mange av desse avisene har eigne reklamebilag eller innstikk som består berre av reklame.

Lokalavisene har òg ein del annonsar. Laussalsavisene VG og Dagbladet vender seg til avislesarar over heile landet og eignar seg derfor i mindre grad til kunngjeringar og annonsering av lokalt tilsnitt.

Radioreklame er betalt annonsering i kommersielle radiokanalar som P4 og RadioNorge. Som oftast er det å lytte til radio ein sekundær aktivitet. Vi høyrer på radio mens vi held på med andre ting: når vi køyrer bil, når vi tek bussen, når vi lagar mat, og når vi går til frisøren. Sjølv om dei fleste ikkje lyttar så mykje til radio, er vi ofte i situasjonar der vi blir eksponerte for radioreklamen. Vi spring jo ikkje ut av frisørsalongen når reklameinnslaga kjem.

Kommersielle radiokanalar sender gjerne reklameblokkar tre til fire gonger per time. Ei reklameblokk består vanlegvis av fleire reklamespotar på 30 sekund som følger etter kvarandre. I radiospotar er det lyd som skaper bileta.

Ein radiospot er gjerne sett saman av

• tale (monolog eller dialog)
• miljølyd (kontentum)
• effektlyd
• musikk

Skal ein lage ein radiospot, er det aller viktigaste å ha ein god idé. Enkle dramatiseringar og humor er mykje brukt i radiospotar for å fange merksemda til lyttarane. Radio er eit flyktig medium. Vi har ikkje moglegheit til å "spole tilbake" for å få med oss bodskapen ein gong til. Derfor er det ekstra viktig at språk og bodskap i ein radioreklame er enkelt og lettfatteleg.

Som i all reklame er formålet med reklamefilmen å skape merksemd rundt eit produkt eller ei teneste. På same måte som for radiospoten, fortel filmen ei historie med både byrjing og slutt. Ein god idé og ei god historie er alfa og omega. Reklamefilmen bruker dei filmatiske verkemidla som i seriar og spelefilm, men i ei fortetta form.