Ulike typar ris
Kor lenge risen koker, kva type ris vi nyttar, kva vi koker risen i – det er mange ting som påverkar korleis det ferdige resultatet blir. Både heime hos folk og på profesjonelle kjøkken nyttar ein "boil in bag" og fleire typar hurtigkokt ris. Tid er pengar, men tid påverkar òg kvaliteten på den ferdige risen. I denne oppgåva skal du mellom anna få prøve om du kjenner forskjell på ris kokt med ulik koketid.
Kok hurtigris slik det står på pakka, men ikkje tilset salt i vatnet.
Kok langtidskokt ris slik det står på pakka, men ikkje tilset salt i vatnet.
Kok hurtigris slik det står på pakka, og tilset salt i vatnet.
Kok langtidskokt ris slik det står på pakka, og tilset salt i vatnet.
Smak på alle dei fire variantane av ris. Vurder smak og konsistens. Vart det nokon forskjell på ris med lang koketid og hurtigkokt ris? Vart det nokon forskjell på ris kokt med og utan salt i vatnet?
Lag pilaffris av 1 finhakka sjalottlauk, 1 fedd finhakka kvitlauk, 40 g smør, 375 g langkorna ris og 7,5 dl grønsaks- eller kyllingkraft.
Fres lauk og kvitlauk med smøret i ein kasserolle. Ha i risen, og rør rundt. Fyll på med kraft, og kok opp. Lat risen småkoke til ønskt konsistens.Lag risotto av 2 dl risottoris, 1,5 dl tørr kvitvin, 1 sjalottlauk, 1 fedd kvitlauk, 8 dl grønsaks- eller kyllingkraft, 20 g riven parmesan, 4 ss usalta smør og 4 ss olivenolje.
Finhakk lauk og kvitlauk, og surr dette i litt av smøret til det blir blankt. Skyl risen godt i ei sikt, og ha risen i panna saman med lauk og kvitlauk. Surr dette godt saman før du tilset kvitvinen. Når vinen er kokt nesten heilt inn, tilset du kokande kraft, ei ause om gongen. Lat det koke ei stund før du tilset meir. Det er viktig å røre jamleg. Når risen er mør (etter ca. 20 minutt), monterer du risottoen med parmesan, smør og olivenolje. Smak til med salt og pepar. Det er viktig at risottoen ikkje koker etter at du har tilsett parmesan.- Smak på begge variantane av smaksett ris. Vurder smak og konsistens på begge. Grunngi kva du likte best.
