Å anerkjenne andre

Gå saman i ei gruppe med tre deltakarar. Lag eit rollespel med ein samtale eller ei hending mellom eit barn og ein barne- og ungdomsarbeidar. Ta gjerne utgangspunkt i ei konkret erfaring som ein av dykk har hatt. Rollespelet har som mål at barne- og ungdomsarbeidaren skal forstå og anerkjenne barnet. Vel roller: barn, barne- og ungdomsarbeidar og medhjelpar/støtte til barne- og ungdomsarbeidaren.

Barnet og barne- og ungdomsarbeidaren gjennomfører rollespelet med vekt på at barne- og ungdomsarbeidaren

• verdset barnet

• prøver å forstå og stiller opne spørsmål og lyttar

• stadfestar opplevingane, kjenslene og tankane til barnet

• speglar tankane og kjenslene til barnet

• undrar seg og er nysgjerrig utan å vite sikkert

• fortel att for å sjekke om det er forstått riktig

• bringer inn nye perspektiv og idéar og ser om dei har noko å seie

Barne- og ungdomsarbeidaren kan når som helst under rollespelet stoppe og spørje medhjelparen om støtte og direkte rettleiing.

Barnet fortel om korleis det opplevde å bli møtt med anerkjennande kommunikasjon og kjem gjerne med forslag til forbetring.

Alle i gruppa diskuterer sjølve situasjonen med hovudvekt på

• opplevinga til barnet og korleis det er å anerkjenne andre

• opplevinga til barne- og ungdomsarbeidaren

Gjenta rollespelet med nye roller til alle har fått prøvd seg som barne- og ungdomsarbeidar.