Kva er ein tale?

Politiske talar skal elde opp og overtyde, og politikarar må meistre alt frå korte appellar og debattinnlegg til store landsmøte-talar.

Høvestalar er talar ved ulike formelle og høgtidlege høve. Slike talar skal kaste glans over ei spesiell hending eller heidre ein person, og dei skal uttrykkje det dei frammøtte føler. Døme på høvestalar er 17. mai-talar og nyttårstalane til kongen og statsministeren.

Men det er ikkje berre politikarane og medlemmane av kongefamilien som må lære seg å tale for forsamlingar. Også som privatpersonar er vi faktisk nøydde til å halde høvestalar nokre gonger i livet – i ein konfirmasjon kanskje, i eit bryllaup, ein bursdag, ei gravferd, kanskje også i jobben. Å kunne seie nokre velvalde, gode ord om ein person er ein viktig sosial dugleik. Ein slik tale treng verken vere lang eller veldig original for å gjere jobben sin, nemleg å glede eller trøyste.

I ein tale er det orda som er viktigast. Av og til passar det godt å bruke bilete eller bakgrunnsmusikk, men først og fremst er det stemmebruk og kroppsspråk som skal understreke det som blir sagt med ord. I tillegg bør talaren kle seg etter høvet.