Instrumentsignal og justering

Kjenner du til to av desse storleikane, kan du rekne ut den tredje ved å bruke ein av desse formlane:

$$\begin{gathered} \mathrm{U}=\mathrm{R}·\mathrm{I} \\ \mathrm{R}=\frac{\mathrm{U}}{\mathrm{I}} \\ \mathrm{I}=\frac{\mathrm{U}}{\mathrm{R}} \end{gathered}$$

Dette kallast Ohms lov. For å forstå tydinga av desse formlane kan du tenke deg at straum (I) er talet på elektron som passerer gjennom ein leidning. Spenninga (U) seier noko om kor stor kraft som blir brukt for å dytte elektrona gjennom leidningen, og motstanden (R) fortel oss om kor stor hindring elektrona møter. Av formlane kan du då sjå at om motstanden aukar, så må òg spenninga auke om vi skal klare å halde oppe straumstyrken (mengda elektron).

Den aller mest brukte metoden for å overføre signal frå instrument i prosessindustrien er å bruke eit elektrisk signal der straumen varierer mellom 4 og 20 mA (milliampere). Tenk deg at termometeret ditt går frå -30 °C til 50 °C. Då vil ein temperatur på -30 °C svare til eit elektrisk signal med straumstyrke på 4 mA. Når temperaturen blir 50 °C, vil det svare til eit signal på 20 mA.

Ein annan måte å formulere dette på er å seie at målesignalet går frå 0 til 100 prosent. Då svarer til 0 prosent den nedste grensa av måleområdet (som her er -30 °C), og 100 prosent svarer til den øvre grensa av måleområdet (som her er 50 °C). Døme på ulike temperaturar og tilhøyrande elektriske signal blir viste i tabellen nedanfor.

Når vi gjer ei nullpunktsjustering av instrumentet, betyr det at vi set det til å gi eit 4 mA signal for den lågaste verdien instrumentet skal måle. For termometeret vårt betyr det at vi stiller instrumentet til å gi eit 4 mA signal ved -30°C.

Områdejusteringa føregår på den måten at vi bestemmer kor stor avstand det er mellom minste og største verdi for instrumentet. I termometerdømet vårt er området på 80 °C (frå -30 °C til 50 °C).