Du får her åtte døme på slike tverrfaglege eksamensoppgåver som har vore gitt til kandidatar som har meldt seg opp til eksamen i logistikkoperatørfaget.
Døme 1
Eksamenstid: 5 timar
Situasjonsbeskriving
Du jobbar som logistikkmedarbeidar i ei bedrift.
Du får i oppdrag å vurdere logistikken i bedrifta og kome med forslag til forbetringar. Bedrifta legg stor vekt på effektiv og økonomisk drift.
Oppgåve
Forklar dei ulike ledda i logistikk-kjeda, og ta deretter for deg moglege forbetringar av kvart ledd.
Døme 2
Eksamenstid: 5 timar
Situasjonsbeskriving
Du jobbar med logistikk i ei bedrift. I det siste har de slite med ei rekkje utfordringar:
- Det har oppstått skadar på emballasje.
- Kostnadene knytte til avfallshandtering har auka.
- Det har vore arbeidsuhell som har ført til fråvær.
- Transportutstyret har ikkje blitt halde ved like godt nok.
- Leveringa til kundane har blitt forseinka.
Oppgåve
Planlegg tiltak til forbetringar, og beskriv korleis desse tiltaka kan gjennomførast.
Døme 3
Eksamenstid: 5 timar
Situasjonsbeskriving
Du jobbar med logistikk i ei bedrift. Bedrifta legg vekt på kapitalbinding, leietid, leveringssikkerheit og lagereffektivitet. Bedrifta kontrollerer logistikken/lagerbehaldninga ved hjelp av eit analyseverktøy.
Oppgåve
Med utgangspunkt i situasjonsbeskrivinga skal du
- gjere greie for ulike typar lager som kan vere aktuelle for denne bedrifta
- vurdere effektivitet og lønnsemd på desse lagera
- vurdere betydninga av omløpshastigheita for lagera
Døme 4
Eksamenstid: 5 timar
Situasjonsbeskriving
Du arbeider i ei konkurranseutsett bedrift. Logistikkfunksjonane er viktige delar av produksjonskjeda. Eit av prinsippa bedrifta har, er å levere riktig mengd i rett tid og til rett stad (“just in time”).
Oppgåve
Vis ved døme korleis riktig og effektiv bruk av “just in time” i bedrifta kan gi auka lønnsemd og sikre arbeidsplassane i bedrifta. Forklar samanhengen.
Døme 5
Eksamenstid: 5 timar
Situasjonsbeskriving
Du jobbar som logistikkoperatør i ei bedrift. Vel ei bedrift du har kjennskap til frå før, til dømes frå arbeid, utplassering, eiga verksemd eller liknande. Legg til eigne føresetnader om naudsynt.
Oppgåve
Forklar samanhengen mellom logistikkfunksjonane og lønnsemda til bedrifta.
- Ta for deg minst éin av logistikkfunksjonane som du meiner er eller kan vere ei utfordring for effektiviteten i bedrifta. Foreslå forbetringstiltak, og grunngi kvifor tiltaket eller tiltaka kan vere ei forbetring.
Døme 6
Eksamenstid: 5 timar
Situasjonsbeskriving
Du arbeider som logistikkoperatør i ei bedrift. Bedrifta møter stadig større konkurranse, og det er naudsynt med effektive logistikkløysingar.
Du må svare på begge oppgåvene.
Oppgåve 1
Ta for deg to eller tre av dei logistikkfunksjonane som du meiner er av størst betydning for økonomien i bedrifta. Forklar kva betydning dei har, og om dei har svakheiter og forbetringspotensial.
Oppgåve 2
Gjer greie for samanhengen mellom omløpshastigheit og økonomi og korleis logistikkfunksjonane kan påverke denne samanhengen.
Døme 7
Eksamenstid: 5 timar
Situasjonsbeskriving
Du er tilsett som logistikkoperatør i eit firma. Vel gjerne eit firma du kjenner frå før.
Firmaet behandlar varer og gods
- innan ulike temperatursoner
- med ulik storleik og vekt
- som toler lite
- med høg verdi
Oppgåve
Du får i oppdrag å plukke og pakke eit vareparti. Vel varer frå eitt av punkta i situasjonsbeskrivinga over.
Beskriv kva du vil gjere, korleis du vil gjere det, og kvifor du vil gjere det.
Svaret ditt bør mellom anna innehalde desse momenta:
- emballasje og tekniske hjelpemiddel
- lasting, lossing og sikring
- krav til levering/leveringsvilkår
- miljømessige og økonomiske konsekvensar
Døme 8
Eksamenstid: 5 timar
Situasjonsbeskriving
Du er tilsett som logistikkoperatør i ei bedrift. Vel gjerne ei bedrift du har kjennskap til frå før, til dømes arbeid, utplassering, eiga verksemd eller liknande.
Profesjonell yrkesutøving og eit godt rykte/renommé er viktig for å halde ved lag posisjonen bedrifta har i marknaden.
Oppgåve
Ta utgangspunkt i vare- og informasjonsflyten i bedrifta, og forklar
- kvifor god service og kundebehandling er viktig
- korleis du kan vere med på å forbetre servicen og kundebehandlinga som logistikkmedarbeidar i bedrifta
- korleis du ved å vere profesjonell i yrket ditt kan påverke effektivitet, tryggleik, miljøvennlegheit og lønnsemd