Servicerolla

Tenk deg at du er invitert i bursdagsselskap til ein god ven. Ytterdøra står på gløtt. Du kikkar inn, men ser ingen. Du opnar døra forsiktig og går inn. Framleis er ingen å sjå, ingen å høyre. Kvifor er det ingen som tek deg imot? Du blir litt uroleg. Har det skjedd noko? Du står og ventar ei stund. Etter eit par minutt kjem venen din og mor hans opp frå kjellaren med kaker og brus. Uvissa di forsvinn.

Kva om ein liknande situasjon hadde oppstått om du hadde kome inn i ein butikk eller ein resepsjon på eit hotell? Viss servicemedarbeidaren ikkje løftar blikket når vi kjem, oppfattar vi det som uhøfleg og eit uttrykk for manglande interesse. Vi set pris på å bli sette og teke godt imot. Eit venleg blikk og eit smil får oss til å kjenne oss velkomne. Augekontakt signaliserer interesse. Eit blikk – eller manglande blikk – fortel meir enn mange ord.

I eit serviceyrke er det lite som er viktigare enn god kundebehandling. Dei fleste serviceyrke eksisterer nettopp for å tilfredsstille eit behov hos kundane. Servicebedrifter må vere kundeorienterte og kartleggje behov ut frå synsvinkelen til kunden. Målet er å skape sal ved å oppfylle forventningane til kundane og tilfredsstille behova deira på ein god måte.

God service

For ein sals- og reiselivsmedarbeidar legg god service grunnlaget for eit godt sal. Eit godt sal gir bedrifta forteneste, som igjen gir lønn og arbeidsplassar. God service skaper eit tillitsforhold mellom bedrifta og kundane, det gir tryggleik og kan skape lojale kundar.

Totalopplevinga er viktig for kunden, og i servicerolla er du ein viktig aktør, anten du skaper heile eller delar av opplevinga. Viss kunden får tilfredsstilt forventningane og behova sine, vil kunden tilrå bedrifta til andre, og positiv omtale er verd meir enn all annan reklame.

Servicen du yter til kundane, er viktig for omdømet til bedrifta og kan vere avgjerande for om kunden ønskjer å komme tilbake til bedrifta di.