Munnleg kommunikasjon – intern

Opne bilete i eit nytt vindauge

CC BY-NC

Bilete: NTB , Science Photo Library

Det er mange fordelar med munnleg kommunikasjon. Eit viktig fortrinn er at det er ei kommunikasjonsform som gjer det enkelt å ha ein dialog, der to eller fleire partar samhandlar. I ein munnleg dialog har du den fordelen at du ikkje må vente på reaksjonar på det du har sagt; du får tilbakemeldingar med ein gong. Du ser ofte raskt om den andre ikkje oppfattar kva du har sagt. Og viss du ikkje forstår det som blir sagt, kan du be om ei utdjuping eller ei forklaring.

Mange tema er det best å ta opp ansikt til ansikt, i staden for på e-post. Det gjeld spesielt når det er usemjer om noko. Det er lettare å bruke sterkare uttrykksmåtar når du sit føre ein skjerm enn ansikt til ansikt. Det er òg lettare å tolke det ein annan skriv negativt når de er usamde om ei sak. Møtest de og snakkar om saka, vil andletsuttrykk og stemme hjelpe dykk til å tolke kvarandre meir korrekt.

Ei ulempe ved munnleg kommunikasjon er at han krev meir av minnet vårt fordi lyden avtek og blir borte. Det er ikkje som med skrift, der du kan gå tilbake og lese eit avsnitt ein gong til. Dette er viktig å tenkje på når du skal overføre informasjon munnleg. Gi éin beskjed om gongen, gjenta spesielt viktig informasjon, og oppsummer hovudpunkta på slutten.

Når du er i ein samtale med ein kollega, må du òg hugse på at det å lytte er ein like viktig del av samtalen som å snakke. Vis at du lyttar med kroppsspråk, blikkontakt og andletsuttrykk. Ta innover deg det den andre seier, og prøv å byggje på det når det er turen din. Sjekk gjerne at du har forstått samtalepartnaren riktig. Viss du berre ventar på turen din til å snakke, går du glipp av viktig informasjon.

I arbeidslivet er den munnlege kommunikasjonen eit viktig verktøy. Vi møtest ofte for å diskutere viktige saker. Men det er ikkje alltid vi oppnår det vi ønsker med alle møta. Ei god saksliste med tidsrammer for kvar sak er eit godt utgangspunkt for eit møte. Det er òg viktig at nokon leier møtet og styrer kven som kan snakke, slik at alle får bidra til samtalen. Korleis kan vi bidra til gode møte? Her er nokre tips:

• Be om ordet, ikkje avbryt den som snakkar.
• Ta i mot alle bidrag med respekt, sjølv om du ikkje er samd.
• Hald deg til saka.
• Ver gjerne kritisk og sett ord på problem...
• ... men pass på at du ikkje berre er negativ, og at du kjem med forslag til løysingar.

Som tilsett i ei bedrift kan òg du bidra til å styrkje samhaldet i bedrifta ved å tenkje over korleis du kommuniserer internt med kollegaer. Klaging og baksnakking kan svekkje samhaldet på ein arbeidsplass. Derfor bør vanskelege saker takast opp med leiinga, tilsettrepresentantar og tillitsvalde.