Synsforstyrringar og nedsett syn

Bruk Blindeforbundets nettside Øyehelse og synshemninger til å svare på oppgåvene.

1. Sjukdommen retinitis pigmentosa (RP) er blant dei hyppigaste årsakene til alvorlege synsproblem blant barn og unge. Forklar kva denne sjukdommen medfører for dei som blir ramma.

2. Kva er forskjellen på augesjukdommane grøn og grå stær og behandlinga av dei?

3. Diabetisk retinopati kan vere ein seinkomplikasjon som følge av diabetes. Forklar kvifor denne tilstanden kan oppstå.

4. Meir enn 60 prosent av dei som blir ramma av hjerneslag, opplever synsforstyrringar. Kva er synsutfall, og korleis påverkar dette funksjonsnivået til dei som blir ramma?

5. Kva for nokre andre sjukdommar eller tilstandar som medfører synsforstyrringar, kjenner de til?

Gå inn på Blindeforbundets nettside om hjelpemiddel, og bli kjende med innhaldet der. Diskuter i grupper:

1. Kvifor er det viktig at de som helsefagarbeidarar er kjende med ulike hjelpemiddel for menneske med nedsett syn?

2. Korleis kan hjelpemiddel og tilrettelegging i heimen bidra til kvardagsmeistring og auka livskvalitet for personar med synsutfordringar?

1. Gå saman i par. Den eine har på bind framfor auga slik at hen ikkje ser, mens den andre er følge. Gå rundt på skulen og ut i nærområdet. Byt roller undervegs, og hugs at den som følger, må passe godt på slik at det ikkje oppstår farlege situasjonar. Følget må òg øve på å beskrive omgivnadene og kva som skal skje, slik at den som ikkje ser, er førebudd.

2. Reflekter saman i grupper og i klassen:

• Korleis opplevde de det å ikkje kunne sjå sjølve, men måtte stole på følget?

• Kva lærte de av å vere følge?

• Korleis er skulen og nærområdet tilpassa for menneske med nedsett syn med tanke på krav om universell utforming? Noter forslag til forbetringar på tavla eller i eit felles dokument.