Miljøarbeid for helsefagarbeidaren

Miljøarbeidaren har ulike oppgåver, krav til kompetanse og fokusområde avhengig av arbeidsstad. Ein person som er tilsett som miljøarbeidar, får ofte eit medansvar for å leggje til rette aktivitetar som er tilpassa målgruppa. Det kan vere ulike aktivitetar, samankomstar, turar eller små tilretteleggingar.

Miljøarbeidarar har ofte ei fagutdanning, mens miljøterapeutar er personar med høgare utdanning som sjukepleiar, vernepleiar, pedagog eller andre yrkjer. Ein helsefagarbeidar med relevant erfaring eller vidareutdanning kan søkje jobb som miljøarbeidar både i helsesektoren og i oppvekstsektoren.

I helsesektoren vil miljøarbeidarar oftast jobbe i institusjonar eller dagtilbod for ulike grupper. Miljøarbeid i oppvekstsektoren er arbeid rundt det enkelte barnet eller ungdommen og saman med barn og unge i omgivnadene deira, til dømes på skulen.

Miljøarbeid fungerer som regel best når fleire yrkesgrupper samarbeider, og når ein prøver ut ulike aktivitetar i samarbeid med den enkelte brukaren eller gruppe av brukarar. Åtferd blir forma i samspelet mellom menneske og dei forandringane som skjer i omgivnadene. For å forstå korleis menneske reagerer i ulike situasjonar, må vi ha kjennskap til grunnleggjande prinsipp for korleis åtferd blir endra og påverka.