Gïeleldh suerkieh
Dah ovmessie gïeleldh suerkieh soptsestieh guktie åarjel-saemien gïele bigkeme, guktie mijjieh soptsestibie jïh tjaelebe. Daate mijjen grammatihke.
Suerkieh | Bïhkedassh |
|---|---|
Fonologije | gïeletjoeje-learoe, guktie vokaalide jïh konsonaantide jiehtebe |
Morfologije | soptseste guktie baakoeh bigkeme, guktie edtjebe baakoeh sojjehtidh jïh guktie maehtebe orre baakoeh seerkedh |
Syntakse | soptseste guktie maehtebe raajesh bigkedh |
Leksikovne | baakoeh gïelesne, baakoe-learoe |
Semantihke | learoe gïelen sisvegen bïjre jïh guktie edtjebe baakoeh, jiehtegh jïh raajesh guarkedh |
Prosodije | guktie edtjebe baakoeh jiehtedh jïh gusnie edtjebe dïedtem bïejedh gosse baakoem jiehtebe |
Saemien gïelen syntakse soptseste guktie mijjieh raajesh bigkebe. Ovmessie gïelh eah daarpesjh seamma syntaksem utnedh. Baakoeh aktene raajesisnie ovmessie råållah utnieh. Baakoeh mah ovmessie funksjovnh raajesinie utnieh mijjieh raajese-lïhtsine gåhtjobe. Gaajhkh raajesh raajese-lïhtsh utnieh.
Vuesiehtimmien gaavhtan verbaale, subjekte, objekte jïh adverbijaale.
Morfologije lea learoe mij soptseste guktie baakoeh bigkeme. Vuesiehtimmien gaavhtan guktie baakoeh sojjehtibie jïh guktie baakoeh seerkebe. Gosse baakoeh sojjehtibie dellie mijjieh baakose minngie-gietjiem (suffiksem) lissiehtibie. Vg: bïenje – bïenje + m. Gosse baakoeh seerkebe dellie orre baakoeh maadth-baakoste darjobe, v.g. vaedtsedh - vaadtsajidh.