Tjuekies jaepie
Muvhten jaepien lopme båata mihkels-meassoe tïjjen baahke laantese, jïh dellie numhtie sleeskie ebrine jïh aaj lopmine sleehtie, jïh dellie numhtie tjaktjem ij bïevlh gænnah. Jïjnje lopme lea darhkan sjïdteme, dellie dïhte båatsoe galka gåatodh dam slïedtje laantem. Burhvie lea sleadtjan, jïh kraesie lea aaj sleadtjan. Man guhkiem numhtie dïhte slïedtje laante njamma dam bovtsem guktie tjoehkehts sjædta. Miesie sarva viesjehts sjædta, jïh minngemest destie dellie tjarve sjædta, jïh låemide lea lopme heeveme. Ij jeatja goh burresne leah naaken njuenie-raejkieh.
Jïh gosse edtjebe dellie vaereste jåhtajidh, dellie dïhte veasjomes bovtse, miesie sarva, tjuedtjele. Men dïhte sarva dåerede rihrie-raejkien, lovvesje lïegkede, jïh aaj snööleste rihrie-baahkoem naan moerh gusnie jievjemh gaavna. Men miesie dïhte tjöödtjeste dosse daase, jïh dïhte ij jiermiem utnieh rihriem goeredh. Dïhte fissjerde bïjre jarkan goske jaama. Jïh gosse stoerre vuemide båata dïhte båatsoe, desnie lea tjarve, jïh dïhte slïedtje lopme lea deadteme dam burhviem, dïhte lea gællan dan laanten mietie.
Minngemes sjædta plaave tjuekie, ij mij gih jeatja goh jievjemh. Jaa nov gåarede mearan lea sielie-moere, men sleehtie jïh obre våålese dam moerem, dïhte moere sjædta öövre jïengine, dellie barre naaken sijjie moeren sisnie, åeksiej sisnie naaken sielie-åeksie.
Dagkere jaepie lea stoerre tjuekies jaepie. Bovtse nöölke jïh jaamede barre nielkien (nealkomen) dïehre (gaavhta). Gåessie gïjre-jaepien gosse viht sielie-moere sjædta, dellie buerebe sjædta. Men bårhvan ij annje baahtsh gih guktie, jïh laante lea aave (öövre) jïengine deavan jïh lopmen gaskesne. Dagkerh daelvieh leah stoerre krievvieh håhkeme – jamkelamme.
jievjemh = joevjemh
Gaaltije:
Bergsland, K., Hasselbrink, G. & Holm Bull, E. (1985). Saemien lohkeme-gærja. (2.utg) Universitetsforlaget