Kostymesyar

Som kostymesyar produserer du nye kostyme og forandrar og held ved like klede og eksisterande kostyme. Du jobbar med saum og andre teknikkar på ulike materiale. Kostyma skal fungere saman med hattar, sko eller anna tilbehøyr, så du må tenkje heilskap i arbeidet.

Du bør vere kreativ og systematisk, ha estetisk medvit og sans for form og farge. I arbeidet treng du kunnskap om særtrekka til kostyme ut frå tidsepoke, snitt, silhuett og materiale. Du må kunne kommunisere godt med designar, kunstnariske aktørar og andre kollegaer.

Utdanninga for å bli kostymesyar er to år i vidaregåande skule og to år i lære i bedrift. Det første året tek du Vg1 handverk, design og produktutvikling. Det andre året vel du Vg2 saum og tekstilhandverk. Etter to år i lære i kostymesyarfaget kan du ta sveinebrev.