Grammatik: Preteritum av sein og haben
Verba sein og haben
Verba sein (å vere) og haben (å ha) er dei mest brukte verba i det tyske språket. Både presensformene ist (er) og hat (har) og preteritumsformene war (var) og hatte (hadde) høyrer til dei hundre mest brukte orda i tysk. Veldig få andre verb er med på denne eksklusive lista. Derfor er det smart å lære seg å bøye sein og haben i presens og preteritum!
Preteritumsform av sein og haben
I munnleg tysk bruker vi til vanleg presens perfektum om noko som allereie har hendt:
Ich habe gestern einen Film gesehen.
Was hast du am Wochenende gemacht?
Men verba haben og sein bruker vi vanlegvis i preteritum sjølv om vi elles uttrykker oss i presens perfektum. Til dømes seier vi gjerne ich war i staden for ich bin gewesen eller er hatte i staden for er hat gehabt.
Ich war im Kino. (Ich bin im Kino gewesen.)
Wir hatten eine Geburtstagsparty für Magda. (Wir haben eine Geburtstagsparty für Magda gehabt.)
sein | haben | |
|---|---|---|
| ich | war | hatte |
| du | warst | hattest |
| er, sie, es | war | hatte |
| wir | waren | hatten |
| ihr | wart | hattet |
| sie, Sie | waren | hatten |
Øving 1
Øv på å bøye sein og haben i preteritum. Repeter øvinga til du klarer å få endingane rett utan å sjå på tabellen.
Øving 2
Jobb gjerne saman to og to.
Les setninga høgt og sett ho om til norsk. Vel i-ikonet for å samanlikne med fasiten.
Gjer deretter setninga om frå presens til preteritum. Sei svaret høgt.
Snu kortet og sjekk om svaret stemmer overeins med fasiten. Gå vidare til neste kort.