Vurdering av skriftleg eksamen
Generelt om vurdering av eksamen
Skriftleg eksamen i framandspråk består av to delar: lesing og skriving. Kandidaten får poeng for kvar oppgåve, og summen av desse poenga gir den endelege karakteren.
Lesedelen og skrivedelen tel 50 prosent kvar av totalkarakteren. Kandidaten må bestå begge delane, altså få minst karakteren 2 på både lese- og skrivedelen, for å bestå heile eksamen.
Utdanningsdirektoratet utarbeider kvart år eksamens- og sensorrettleiingar. Vurderingskriteria og poengskalaene kan variere frå år til år. Her tek vi utgangspunkt i følgande rettleiingar:
Eksamensrettleiing for framandspråk nivå I og II, vår 2026
Rettleiing for sensur av oppgåver i spansk I, II og III etter LK20 (frå 2024)
Begge rettleiingane ligg på nettsidene til Utdanningsdirektoratet.
Del 1: Leseforståing
Leseforståingsoppgåvene på eksamen blir retta og vurderte automatisk. I eksamenssettet vårt får elevane oppgitt kor mange poeng dei oppnår på kvar oppgåve, men poenga blir ikkje summerte automatisk eller gjort om til ein karakter. Derfor bør elevane skrive ned poenga dei får når dei svarer på oppgåvene, og summere dei til slutt.
Tabell A viser ein poengskala for leseforståingsdelen. Poengskalaen liknar på den som har blitt brukt på tidlegare eksamenar. I oppgåvesettet vårt kan eleven oppnå maksimalt 30 poeng: 7 poeng i oppgåve 1, 4 poeng i oppgåve 2, 8 poeng i oppgåve 3 og 10 poeng i oppgåve 4.
Talet på poeng | Karakter |
|---|---|
27–29 | 6 |
| 22–26 | 5 |
| 17–21 | 4 |
| 13–16 | 3 |
| 9–12 | 2 |
| 0–8 | 1 |
Del 2: Skriveoppgåver
Å kommunisere er det viktigaste i framandspråk. Det ein elev skriv, må bli forstått av mottakaren. Fleire sider ved språkbruken, til dømes korrekt grammatikk, rett setningsstruktur og eit passande og variert vokabular, bidreg til at innhaldet i ein tekst blir formidla på ein tydeleg måte.
Det er lurt å trene elevane på å
ha med alle punkta som oppgåva spør om
skrive det talet på ord som oppgåva krev
kontrollere språket slik at kvaliteten på svaret blir betre
bruke eit passande og variert vokabular
unngå å bygge setningar med fleire ledd enn dei klarer å handtere
Vurderingskriterium
Skriveoppgåvene blir vurderte i sin heilskap. Sensor gir poeng for formidling, relevans, grammatikk, setningsstruktur, vokabular, rettskriving og språkhandlingar.
Formidling
I kva grad får tekstane fram eit relevant innhald på ein forståeleg måte? Berre det som faktisk svarer på oppgåvebestillinga, skal vurderast. Dersom eleven ikkje svarer på alt oppgåva ber om, vil hen ikkje kunne få full utteljing.
Poengtal | Vurderingskriterium |
|---|---|
| 4 poeng | Kommunikasjonen er tydeleg. Tekstane er ikkje nødvendigvis feilfrie, men dei er svært enkle å forstå og har god flyt. |
| 3 poeng | Kommunikasjonen er stort sett tydeleg. Tekstane har nokre feil, men er stort sett lette å forstå. |
| 2 poeng | Kommunikasjonen er delvis tydeleg. Tekstane har feil som gjer dei vanskelege å forstå. |
| 1 poeng | Kommunikasjonen er berre innimellom tydeleg. Tekstane er oppstykka og/eller usamanhengande, og vanskelege å forstå. |
| 0 poeng | Kommunikasjonen er svært svak. Nokre få setningar kommuniserer på ein enkel måte, men dei fleste gir ikkje meining eller er ikkje fullstendige setningar, berre "relevante" enkeltord. |
Relevans
Svarer eleven på alt oppgåva ber om?
Poengtal | Vurderingskriterium |
|---|---|
| 2 poeng | Alle tekstane svarer på heile oppgåvebestillinga. Dette inkluderer talet på ord som oppgåvene krev. |
| 1 poeng | Tekstane svarer ikkje på heile oppgåvebestillinga. |
| 0 poeng | Ein eller fleire tekstar manglar eller er ikkje relevante. |
OBS!
Dersom svaret får 0 poeng for formidling, vil det automatisk få 0 poeng for relevans. Dersom svaret får 0 poeng for relevans, vil det automatisk få 0 poeng for formidling.
Grammatikk
Meistrar eleven grammatiske reglar og klarer å bruke dei i tekstane sine? Med grammatikk siktar ein til dømes til verbbøying (person og tid), kasus, register osv.
Poengtal | Vurderingskriterium |
|---|---|
| 3 poeng | Grammatikken er stort sett korrekt. Det er berre nokre få småfeil i tekstane. Dette går ikkje utover formidlinga av innhaldet. |
| 2 poeng | Grammatikken er delvis korrekt. Det er ein del småfeil i tekstane. Dette kan gå utover formidlinga av innhaldet. |
| 1 poeng | Grammatikken er ofte ukorrekt. Det er mange små og store feil i tekstane. Dette er til hinder for formidlinga av innhaldet. |
| 0 poeng | Grammatikken i tekstane ligg under det nivået som kan ventast på nivå 2. |
Setningsstruktur
Har eleven rett rekkefølge på ord og frasar i ei setning?
Poengtal | Vurderingskriterium |
|---|---|
| 3 poeng | Setningsstrukturen er korrekt. |
| 2 poeng | Setningsstrukturen er stort sett korrekt. |
| 1 poeng | Setningsstrukturen i mange setningar er ukorrekt. |
| 0 poeng | Setningsstrukturen i tekstane ligg under det nivået som kan ventast på nivå 2. |
Vokabular
Bruker eleven eit variert og passande ordtilfang i tekstane sine?
Poengtal | Vurderingskriterium |
|---|---|
| 4 poeng | Vokabularet er variert og passar godt inn i samanhengen. For å få 4 poeng for vokabularet må begge kriteria oppfyllast. |
| 3 poeng | Vokabularet er noko variert og passar inn i samanhengen. For å få 3 poeng for vokabularet må begge kriteria oppfyllast. |
| 2 poeng | Vokabularet er lite variert og/eller passar ikkje alltid inn i samanhengen. |
| 1 poeng | Vokabularet er upresist og/eller passar ofte dårleg inn i samanhengen. |
| 0 poeng | Vokabularet i tekstane ligg under det nivået som kan ventast på nivå 2. |
Rettskriving
Følger elevane reglane for rettskriving og teiknsetjing? (Rett bruk av stor og liten forbokstav er eitt av punkta som høyrer til rettskriving.)
Poengtal | Vurderingskriterium |
|---|---|
| 2 poeng | Rettskrivinga er gjennomgåande korrekt. |
| 1 poeng | Det er nokre få feil i rettskrivinga, men desse forstyrrar ikkje kommunikasjonen i tekstane. |
| 0 poeng | Det er ein del feil i rettskrivinga. |
Språkhandlingar
I kva grad klarer eleven å informere, fortelje, beskrive og grunngi på spansk?
Poengtal | Vurderingskriterium |
|---|---|
| 4 poeng | Tekstane informerer, fortel, beskriv og grunngir på ein svært god måte. |
| 3 poeng | Tekstane informerer, fortel, beskriv og grunngir på ein god måte. |
| 2 poeng | Tekstane informerer, fortel, beskriv og grunngir på ein enkel måte. |
| 1 poeng | Tekstane informerer, fortel, beskriv og grunngir på ein svært enkel måte. |
| 0 poeng | Tekstane gir ikkje tilstrekkeleg grunnlag for å vurdere språkhandlingar. |
Døme på karaktersetjing
Her kjem eit døme på korleis ein vurderer eksamensoppgåvene og reknar ut sluttkarakteren.
Del 1: Lesedel
Ein elev har oppnådd 21 av 29 poeng i del 1. Ifølge tabell A får eleven altså karakteren 4 på lesedelen.
Del 2: Skrivedel
Her vurderer ein tekstane til eleven i sin heilskap ved å bruke tabellane B–H.
Formidling: Tekstane til eleven har nokre feil, men det meste er likevel lett å forstå. Eleven får 3 poeng.
Relevans: Eleven svarer på alt oppgåvene ber om, og får 2 poeng.
Grammatikk: Det er ein del feil i tekstane som nokon gong kan gå utover formidling av innhaldet. Eleven får 2 poeng.
Setningsstruktur: Eleven har brukt feil setningsstruktur i mange setningar og får 1 poeng.
Vokabular: Ordtilfanget til eleven passar bra, men er lite variert. Eleven får 2 poeng.
Rettskriving: Eleven har veldig mange rettskrivingsfeil og får 0 poeng.
Språkhandlingar: Tekstane informerer og fortel bra, men eleven beskriv lite og grunngir ingenting og får 1 poeng.
Totalt har eleven oppnådd 11 av 22 moglege poeng.
Karakter på del 2
Etter at alle oppgåvene er vurderte, blir karakteren sett ut frå poengsummen eleven har oppnådd. I dømet vårt bruker vi ein poengskala som liknar på den som har blitt brukt på tidlegare eksamenar (sjå tabell I nedanfor). Poengskalaene kan variere frå år til år.
Eleven i dømet vårt har fått 11 av 22 moglege poeng og får dermed karakteren 3 på del 2.
Sum av poeng for skriving | Karakter |
|---|---|
| 21–22 | 6 |
| 17–20 | 5 |
| 14–16 | 4 |
| 10–13 | 3 |
| 7–9 | 2 |
| 0–5 | 1 |
Samla vurdering
For å rekne ut samla karakter gjeld følgande reknestykke: karakter på del 1 + karakter på del 2. Så bruker ein tabellen nedanfor for å avgjere den samla karakteren. Denne tabellen liknar på ein som har blitt brukt på tidlegare eksamenar.
Hugs at begge delane må vere beståtte for å få bestått på heile eksamen. Om ein elev til dømes har fått karakteren 6 på del 1 og karakteren 1 på del 2, blir eksamen vurdert som ikkje bestått.
Eleven i dømet vårt har fått karakteren 4 på del 1 og karakteren 3 på del 2. Då blir reknestykket slik: 4 + 3 = 7. I tabell J ser vi at summen 7 svarer til karakter 4. Eleven får altså 4 som samla karakter på heile eksamen.
Total poengsum | Karakter |
|---|---|
| 11–12 | 6 |
| 9–10 | 5 |
| 7–8 | 4 |
| 5–6 | 3 |
| 4 | 2 |
| 0–3 | 1 |