Oppgave
Nasjonale minoritetar
I denne oppgåva skal du velje deg éin av dei nasjonale minoritetane og setje deg inn i historia og kulturen deira.
Romanifolket sitt flagg. Romanifolket blir også kalla taterar. Bilete: AdiJapan / Offentleg eige
Dei fem nasjonale minoritetane i Noreg er jødar, kvener, rom, romanifolket/taterane og skogfinnar. Alle desse minoritene har ei over 100 år lang historie i Noreg og har derfor sterk tilknyting til landet, trass i ein politikk som ikkje alltid har behandla gruppene på ein god måte.
Jobb saman i grupper og vel dykk ein av dei fem nasjonale minoritetsgruppene som de skal jobbe med. Arbeidet skal leie fram til ein presentasjon. Korleis de ønsker å presentere, er opp til dykk. Det kan vere ein powerpoint, ein film, eit blogginnlegg, ein digital plakat eller ei veggavis, til dømes.
Spørsmål de bør søkje å finne svar på:
- Kva er den historiske bakgrunnen til den nasjonale minoriteten?
- Korleis har den nasjonale minoriteten vorte behandla av norske styresmakter opp gjennom historia?
- Kva er spesielt med kulturen til den nasjonale minoriteten?
- Korleis er statusen til den nasjonale minoriteten i dag? Har gruppa sin eigen merkedag eller eit forbund som jobbar for dei?
- Opplever den nasjonale minoriteten diskriminering?
- Finst det kjende personar som har opphav i den nasjonale minoriteten?