Oppdekking

Vi dekker bordet på ulike måtar avhengig av kva som skal serverast, kva serveringsmetode som blir nytta, kva høve det er, og stilen og konseptet til serveringsstaden. Fine dining-restaurantar bruker ofte dukar for å skape ein elegant atmosfære, mens meir uformelle serveringsstader kan velje å dekke utan dukar.

Kuvert

Ein kuvert er alt ein gjest treng for å nyte eit måltid. Kuverten inkluderer

• glas
• kuvertasjett
• serviett
• bestikk

Når du skal dekke eit bord, er det viktig å vere nøyaktig. Det er lurt å følge ei bestemd rekkefølge for oppdekking for å få eit ryddig og oversiktleg bord med kuvertane plasserte overfor kvarandre. Kuvertane må vere like breie og ha form som eit kvadrat.

Bestikket på den eine sida av bordet skal ligge nøyaktig på linje med bestikket på motsett side. Bestikket og tallerkenane skal ligge cirka 1,5–2 centimeter frå bordkanten. Glasa skal stå på linje langs heile bordet. Dersom menyen er på fleire enn fire rettar, supplerer vi med meir bestikk og eventuelt glas etter kvart.

Servietten skal vere plassert likt på alle kuvertane i lokalet og vende mot gjestane. Serviettar kan med fordel brettast dagen før du skal dekke bordet. Serviettar er ein del av ein servitør sin "mise en place".

Rekkefølge på oppdekkinga

Det er ofte ein smakssak korleis vi dekker eit bord. Men rettane som skal serverast, og forma på bestikket er med på å avgjere dekkemåten. Dersom du dekker opp i denne rekkefølga, er det mest effektivt, og du slepp å rette på oppdekkinga:

• Dra stolen ut frå bordet.
• Legg på duk.
• Set stolen pent inntil att.
• Dekk på hovudrettsbestikk.
• Dekk på forrettsbestikk.
• Dekk på dessertbestikk.
• Dekk på vinglaset som skal vere til hovudretten, sidan dette skal stå rett overfor hovudrettskniven. Deretter dekker du på resten av vinglasa som høyrer til måltidet.
• Dekk på farrisglas.
• Dekk på kuvertasjett.
• Dekk på smørjekniv.
• Set på servietten.
• Set på dekor som lys og blomstrar.
• Set eventuelt på salt, pepar og tannpirkarar.

Frukostoppdekking

Her dekker du på liten kniv og gaffel, serviett, salt og pepar. Gjesten forsyner seg sjølv med mat og drikke på frukostbuffé. Mange stader dekker ein opp med kaffikopp, og kaffi og te blir servert ved bordet.

Lunsj med bufféservering

Dekk på med liten kniv og gaffel, dessertbestikk, raudvinsglas, farrisglas, kuvertasjett, smørjekniv, serviett, salt og pepar. Suppleringsbestikk eller spesialbestikk legg du på kaldtbordet.

Lunsj etter oppsett meny

Dekk på bestikk etter oppsett meny og med glas tilpassa det gjestane skal drikke. Kuvertasjett, smørjekniv, serviett og apotek skal òg dekkast på.

À la carte

Vanleg à la carte-oppdekking består av stor kniv, stor gaffel, raudvinsglas, vassglas, kuvertasjett og smørjekniv. Bestikket skal plasserast cirka 1,5–2 centimeter frå bordkanten.

Glasa til hovudretten skal stå framfor spissen på kniven som høyrer til hovudretten. Dersom gjesten bestiller forrett og dessert, blir det deretter sett på supplerande dekketøy.

Oppdekking til firerettars meny

Ved firerettars meny blir det dekt opp etter den aktuelle menyen. Dekk opp som forklart under "à la carte".

Det er vanleg å setje glasa på linje og plassere glaset til hovudretten rett overfor hovudrettskniven.

Salt, pepar og tannpirkarar

Dekking med salt- og peparbøsser varierer mellom ulike serveringsstader. I uformelle restaurantar og kaféar er det vanleg å ha det lett tilgjengeleg, slik at gjestane kan tilpasse smaken. Ved oppdekking til større selskap er det òg vanleg å dekke med salt og pepar. I fine dining-restauranter, derimot, er det ofte fråverande, då retten truleg er perfekt balansert av kokken. Ber gjestane om salt og pepar, så får dei sjølvsagt det.

Tannpirkarar blir sette på bordet når hovudretten er rydda av.

Apotek

Eit apotek er ei korg / eit brett med salt, pepar, tannpirkarar, ketsjup, olje og eddik. Det blir brukt apotek på enkelte restaurantar der ein har behov for det, til dømes pasta- eller pizzarestaurant. På ein ordinær restaurant er det ikkje vanleg å dekke opp med apotek.