Kalkun

Vi kan like gjerne servere han kald som varm, og kalkunen passar derfor like godt på eit kaldtbord sommarstid som til julemiddag. Det er ikkje først og fremst på julaftan at kalkunen blir sett på bordet i kvar ein heim. Det skjer først i den selskapelege romjula for å toppe seg på nyttårsaftan.

Kalkun finst i vektklassar frå 3 til 12 kg. Det er likevel 5–7 kg som er mest vanleg. Større kalkunar gir meir kjøtt i høve til bein fordi beinvekta på små og store kalkunar er omtrent lik. Så langt har kalkunen stort sett blitt selt frosen, men det blir stadig meir vanleg med fersk kalkun. Produkt av kalkun som filetar, biffar, pålegg og pølser kjem det stadig meir av på marknaden.

For å minske væsketapet bør vi tine kalkunen i kjøleskap eller på ein kjølig stad. Det tek om lag 2 døgn å tine ein middels stor kalkun. La kalkunen vere dekt til under tining og fjern innmatposen så snart kalkunen er tint.

Press låret på kalkunen utover og snitt i skinnet. Skjer over i leddfestet for å løyse låret frå resten av kalkunen. Del eventuelt låret i to på same måten som kyllinglår. Skjer eit snitt langs brystbeinet og ned ved halsen langs "ønskebeinet". Skjer ut brystfileten ved å la kniven følge skroget frå toppen og ned mot vengefestet. Løys fileten ved å skjere eit snitt på utsida, frå lårfestet mot vengefestet. Gjer det same på motsett side. Vengene løyser du ved å dele dei over i leddet.

Det var indianarane i Mexico som først alte opp kalkun. Då dei spanske conquistadorane invaderte Mexico på 1500-talet blei dei så imponerte over denne fuglen, som smakte så godt, at dei tok med seg kalkunar attende til Spania. Etter kvart spreidde kalkunen seg òg til andre europeiske land. Det er først i dei seinare år at det har blitt vanleg å ete kalkun her i landet, og då i hovudsak til jul og nyttår.

Historia om den amerikanske Thanksgiving-feiringa starta i 1621. Dei engelske pilegrimane som hausten før hadde kome til den nye verda med skipet Mayflower, hadde hatt ein svært hard vinter. Dei lærte likevel å dyrke jorda av vennlegsinna indianarar. Pilegrimane syntest dei hadde mykje å feire, og inviterte indianarane til ein stor takkefest.

Thanksgiving Day er i dag ei viktig høgtid i USA og blir feira fjerde torsdag i november. Maisbrødstuffing, kokte grønsaker, marshmallowgratinerte søtpoteter, potetmos og tranebærsyltetøy er viktig tilbehøyr. Skikken med å feire hausttakkefest er noko kalkunelskarar prøver å gjere til ein tradisjon også her i Noreg.