Oppgåve

Berekraft og ressursutnytting

I denne oppgåva skal du lære korleis rett planlegging, teknikk og råvareforståing kan redusere matsvinn og gje betre utnytting av matressursar. Du skal jobbe både teoretisk og praktisk og reflektere over korleis profesjonelle kjøkken kan redusere avfall.

Del 1: Teoretisk oppgåve

Kom med forslag til korleis ein på ein god og effektiv måte kan hindre at mat blir kasta, ved bruk av

kutteteknikk
restprodukt (kan vi lage noko av restprodukt etter til dømes oppdeling og kutting?)
mengdeutrekning
kvalitetsvurdering av råvarer og produkt

Del 2: Praktisk oppgåve

Du skal lage eit måltid til fire personar av desse råvarene:

1 heil kylling
300 g gulrot
100 g sellerirot
1 blomkål
1 brokkoli
2 sjalottlauk
400 g poteter
2 dl fløyte
1 fersk timian
salt, pepar og krydder som finst på kjøkkenet ditt

Lag ein arbeidsplan og planlegg slik at minst mogleg mat blir kasta. Du vel sjølv kva for tillagingsmetodar du vil nytte. Den maten som blir kasta, skal du vege opp slik at du veit kor mange gram som eventuelt blir kasta. Du skal servere måltidet til fire personar. Når du ryddar av bordet, skal du vege opp dei eventuelle matrestane som blir kasta.

Del 3: Etterarbeid og refleksjon

Kva var dei største kjeldene til matsvinn i dykkar produksjon?
Kva val gjorde de for å redusere svinn?
Kva kunne de ha gjort annleis for å utnytte råvarene endå betre?
Korleis påverkar mengdeberekning og planlegging matsvinn i eit profesjonelt kjøkken?