Kjøttferasar

Rasar med nasjonalt avlsarbeid

Det er TYR som har det overordna ansvaret for avlsarbeidet med kjøttfe i Noreg. Dei driv det nasjonale avlsarbeidet på desse kjøttferasane:

• charolais

• limousin

• hereford

• aberdeen angus

• simmental

Andre rasar

I tillegg til rasane som er nemnde over, finst det òg mange andre kjøttferasar her til lands. Nokre av dei har eigne raselag utan at det blir drive avlsarbeid på nasjonalt plan.

Ekstensiv eller intensiv drift?

Det er viktig at du vel ein rase som passar til drifta på garden din. Nokre rasar krev forholdsvis sterk fôring og veks raskt (intensiv drift), mens andre klarer seg betre med svakare fôring og treng dermed lengre framfôringstid før dei blir slaktemodne (ekstensiv drift).

Intensiv drift

Dei store og tunge rasane eignar seg best til intensiv drift. Dei har god tilvekst og gir høge slaktevekter. For å få godt resultat i intensiv drift må du ha godt og næringsrikt grovfôr. Desse dyra treng òg kraftfôr for å utnytte vekstpotensialet best mogleg.

Her er nokre av rasane som eignar seg godt til intensiv drift:

• charolais

• blonde d'aquitaine

• simmental

• limousin

Ekstensiv drift

Her er det dei litt mindre og lettare rasane som eignar seg best. Dette er dyr som kan hente mykje av fôret sitt på beite og likevel ha relativt god tilvekst. Sidan fleire av desse rasane er lette i kroppen, kan dei òg utnytte beite i ulendt terreng.

Utedrift

Nokre av rasane eignar seg òg godt i utedrift, men då må du alltid sørge for at dei har frostfritt vatn og nok fôr gjennom vintersesongen. Dei skal òg ha tilgang til eit skjul med tre tette vegger og tak så dei kan søke ly når dei treng det.

Her er nokre av rasane som eignar seg i ekstensiv drift:

• aberdeen angus

• skotsk høglandsfe

• hereford

• belted galloway

• tyrolsk gråfe

Oppgåver