Motorisk utvikling hos barn 1 til 6 år
Utviklinga av motoriske ferdigheiter skjer kontinuerleg. Det betyr at utviklinga har ein jamn framgang eller gradvis auke og byggjer på tidlegare erfaringar. Det ser ut til at utvikling av rørsler går føre seg i ei bestemd rekkjefølgje: frå å krype og krabbe til å gå, springe og hoppe.
Før dei er tre år, startar barn det første steget mot å lære dei grunnleggjande rørslene (krype, krabbe, rulle, sitje, gå, springe, hoppe, hinke, gripe, kaste, klatre og så vidare). I fire–femårsalderen blir dei grunnleggjande ferdigheitene utvikla slik at barna meistrar dei grunnleggjande rørslene i ulike miljø.
Oversynet nedanfor viser sentrale trekk ved den motoriske utviklinga. Tabellane er utarbeidde av T. Moser og R. Storli (2014). Det er viktig å merkje seg at innanfor eit felles utviklingsmønster vil det finnast store individuelle skilnader. Utviklinga er individuell og avheng av dei medfødde eigenskapane og tidlegare erfaringane til barnet, i tillegg til det fysiske og sosiale miljøet og oppgåvene som skal bli utførte/lærte.
Alder | Gonge |
|---|---|
Eittåringen | Breitt fotfeste, utan rotasjon i ryggsøyla. Lett bøyg i kne og hofter. Flat fot. Armane er bøygde og blir haldne høgt for å halde balansen. Gåing baklengs. Overgang stilleståande og gonge (start og stopp). |
Toåringen | Forbetra gangmønster, mindre breitt fotfeste, betre balanse og byrjande fotavvikling (hæl–tå-gange). Byrjar å halde balansen på eitt bein. |
Treåringen | Koordinert diagonalt gangmønster, med fotavvikling, avrulling (set hælen først ned i steget). Armane byrjar i eit kryssmønster og armsving. Byrjande rotasjon i ryggsøyla. |
Fireåringen | Ledig gonge med velutvikla armsving med kryssmønster. Vekselvis gonge i trapper oppover (framleis kan det vere litt vanskeleg nedover). |
Fem–seksåringen | Diagonalgang med full rotasjon i ryggsøyla. God fotavvikling. |
Alder | Springing | |
|---|---|---|
Eittåringen | Spring med små skritt, stive bein og armar utan koordinasjon mellom armar og bein. | |
Toåringen | Spring på flat fot med ein byrjande svevefase i løpet. Plutselege retningsendringar blir mogleg. Barnet kan auke og dempe farten og stoppe brått. | |
Treåringen | Løpsrørsla utviklar seg sterkt. Raske retningsendringar og rørsletilpassingar. Koordinert start og stopp av forflyttingar. | |
Fireåringen | Fullutvikla løpsrørsle, set hælen først i bakken og har koordinert armsving. | |
Fem–seksåringen | God koordinasjon mellom armar og bein i springing. Diagonal bruk av arm og bein. Kan skifte rørslemønster (springe og hoppe). Kombinasjon av fleire rørsler (springe og sparke ein ball). |
Alder | Hopping |
|---|---|
Toåringen | Første hopping, mest på flat fot. Startar ofte med å hoppe på staden. |
Treåringen | Hoppar ned frå noko og hoppar over hinder på to bein. Kan hoppe framover med samla bein. |
Fireåringen | Hoppar meir nyansert og byrjande hinkehopp. |
Fem–seksåringen | Hopping er automatisert, hoppar på to bein med svikt og kan utføre mange hopp etter kvarandre. Kan hoppe strikk. Hoppar over hinder på eitt bein og hinkar på kvart bein. |
Alder | Kast og ta imot |
|---|---|
Eitt- og toåringen | Før barnet er eitt år, er det vanskelegare å sleppe ein gjenstand enn å ta han. Kaster og sparkar ball. Kaster ofte med to hender. |
Treåringen | Kastar retningsbestemt, men utan styrke og presisjon. Byrjande (enkelt) mottak av ball. |
Fire–femåringen | Utfører kast over hovudet. Nyttar rørslene til kroppen, dreier kroppen slik at kastet blir meir effektivt. Kastar meir målretta mot ein blink. Mottak av ball mot kroppen, blir sikrare. |
Fem–seksåringen | Kastet får styrkje og presisjon. Vektoverføring frå høgre til venstre fot eller omvendt under kastet. Byrjande mottak av liten ball med aktivt grep (to hender). |
Klatring
I eittårsalderen startar barn med byrjande klatring på trapp, stol eller benkar. Etter kvart som barnet meistrar klatring, som er eit kryssa rørslemønster med armar og bein, vil dei like å klatre. I treårsalderen klatrar dei vanlegvis ikkje høgare enn dei klarer sjølv utan assistanse. Eldre barn klatrar høgt og utfordrar seg sjølv.
Alder | Finmotorikk |
|---|---|
Eittåringen | Pinsettgrep er for det meste utvikla. Nyttar hendene parallelt og symmetrisk. Blir styrt mykje frå skulder og olbogeledd. Byrjande bruk av skei. Leik med klossar (enkel bygging). Innover-rotert tverrgrep. |
Toåringen | Byrjande utvikling av handdominansen. Held fram med innover-rotert tverrgrep – nokon byrjar allereie med blyantgrepet. Kan nytte etereiskap. Byrjande meistring av enkle konstruksjonsleikar (klossar blir sette etter kvarandre horisontalt, nokon byrjar allereie vertikalt). Sparkar og slår meir målretta mot objekt i rørsle (ball). |
Treåringen | Kan nytte fingrane meir og meir "uavhengig." Grepet blir meir utover-rotert. Meistrar å byggje med klossar i høgda. Konstruksjonsleiken blir meir avansert, set klossar både etter kvarandre og oppå kvarandre (vertikalt). Byrjande (enkelt) mottak av ball. Klarer noko påkleding sjølv. |
Fireåringen | "Forfingergrep" med alle fingrar blir perfeksjonert. Bruk av etereiskap blir automatisert. Teiknar enkle figurative motiv (hovudfoting). Heller i ein kopp, et med kniv og gaffel. |
Femåringen | Vakse blyantgrep, "utoverdreitt". Tuppen av tommelfinger kan førast mot alle dei andre fingertuppane. Meistrar puslespel motorisk. Meir avansert reiskaps- og verktøybruk. Smør brødskive. Klipper langs ei linje og teiknar mellom linjer. Spretter ball mot golvet (relativt kontrollert). |
Seksåringen | Klipper ut figurar. Fargelegg presist. Meistrar variert mottak av ball mot brystet, byrjande fritt ballmottak. Kastar større ball opp og fangar han igjen, slår ball mot ein vegg |
Utfordringar til deg
- Korleis kan du observere den motoriske utviklinga til barn?
- Korleis kan du leggje til rette for fysisk aktivitet for barn i barnehagen? Gi konkrete døme.
- Kva betyding har fysisk aktivitet for barn i barnehage?