Fag

Oppgåve

Video

Bli god til å presentere

Øv deg på å framføre for andre. Start med å sjå videoen som kort forklarer deg korleis du kan bli betre til å presentere.

Video med råd og tips om korleis du kan lage gode presentasjonar. Video: NDLA / CC BY-SA 4.0

Oppgåve 1. Kva hugsar du frå videoen?

Svar på spørsmåla etter at du har sett videoen over:

Korleis presenterer Jone seg?
Kva meiner Jone med at du ikkje skal vere ein bløffmakar? Du kan bruke ordboka Lexin til å finne ut kva ordet betyr.
Kva råd hugsar du? Skriv ei liste med råda. Del så med ein medelev og sjå om de kjem på fleire råd saman.
Sjå på råda i boksen under og diskuter med ein medelev:
- Kva synest de er det vanskelegaste rådet å følge?
- Kva kan de gjere for å få det betre til?

Presentasjonsråda med døme

Ha klart for deg det du ønsker å formidle: bodskapen
- Du planlegg godt det du skal snakke om på førehand.
Sjå folk i auga
- Sjå på ulike folk som sit på ulike stader i rommet.
Presenter deg sjølv
- Sei namnet ditt og kven du er, til dømes at du er elev på skulen.
Fortel kva presentasjonen skal dreie seg om
- Du kan til dømes starte med å seie: "I dag skal eg snakke om ...".
Bruk kunnskapen du har om emnet og snakk fritt
- Øv deg på å snakke utan å lese opp tekst du har skrive på førehand (manus).
Unngå å bruke ord du ikkje sjølv forstår
Det er viktigare å vise at du forstår det du seier enn å bruke vanskelege ord.
Bruk illustrasjonar og forteljingar for å gjere presentasjonen interessant
- Gode bilete gjer at publikum følger betre med. Det same gjeld ei morosam forteljing, men det må passe til temaet du snakkar om.
Bruk stor skriftstorleik og få ord. Unngå å bruke for mange punkt og punktlister
- For mykje skrift gjer at publikum les det som står og ikkje får med seg det du seier. Bruk derfor ikkje meir enn 6–8 stikkord på kvart lysark.
Prøv å bruke få lysark
- Det du seier, er det viktigaste. Lysarka er der for å gjere presentasjonen meir interessant. Bileta skal støtte det du seier.
Samanfatt og konkluder
- Du kan til dømes avrunde med å seie: "Eg har no vist at ..." eller "Kort sagt kan vi seie at ...".

Oppgåve 2. Presenter deg sjølv

Lag ein kort presentasjon av deg sjølv på 3 til 5 lysark.
Bruk eit digitalt presentasjonsverktøy til å setje saman informasjonen.
Ta gjerne for deg interesser, favorittmat, filmopplevingar, aktivitetar og personlegdom.
Framfør presentasjonen framfor klassen/gruppa. Hugs alle råda i videoen! Sjå han på nytt eller les oppsummeringa i tekstboksen i oppgåve 1.

Oppgåve 3. Presenter eit tema

Gå saman i grupper på tre–fire personar. Finn ut korleis de i gruppa bruker sosiale medium.
Kva sosiale medium er mest populære? Kva for eit er nyast? Kva kan de ikkje klare dykk utan? Korleis bør vi stille oss til sosiale medium i skulekvardagen?
Lag ein presentasjon på 10 lysark som viser gruppa sin bruk av sosiale medium og synspunkta dykkar. Presenter for klassen. Hugs alle råda i videoen! Sjå han på ny eller les oppsummeringa i tekstboksen i oppgåve 1.