Jobb med kortfilmen Mamma

Når vi skal snakke om rusavhengnad, må vi kjenne til nokre viktige omgrep. Jobb saman med ein medelev. Forsøk å svare på spørsmåla før de vender korta.

Sjå kortfilmen Mamma på bibliotektenesta Filmbib.

For å sjå filmar på Filmbib må du skaffe deg Bibliotekkortet på sidene til Nasjonalbiblioteket.

Jobb gjerne saman i små grupper med desse oppgåvene.

1. Mamma og medhjelpar

Kortfilmen Mamma gjer synleg kor vanskeleg det er å vere næraste pårørande til ein rusavhengig. Filmen viser òg korleis den rusavhengige, gjennom veremåten sin, kan ta kontroll over livet til andre familiemedlemmer. Prosjektkoordinator Merete Almås i Nasjonalt kompetansesenter for psykisk helsearbeid kallar det medavhengnad (Almås, 2018).

Reflekter saman:

1. Kva er ei god mamma? Finn døme på eigenskapar de meiner ei god mamma bør ha.

2. Kva er det ved måten Synnøve opptrer på i filmen som ein kan forstå som medavhengnad?

3. Var det rett av Synnøve å gi Michelle pengar til ein ny heroindose? Kva oppnådde ho med å gjere det? Kva ville ha skjedd dersom ho let vere?

4. Kva er rett av Synnøve å gjere av omsyn til Isabell?

2. Å blottlegge livet sitt på film

Mamma bygger på ei sann historie, og Synnøve og Michelle speler seg sjølve i filmen.

1. Kva forteljartekniske grep bruker regissøren for å underbygge det dokumentariske i forteljinga?

2. Kva forteljartekniske grep blir brukte for å gi sjåarane eit inntrykk av rusmiljøet Michelle er ein del av?

3. På kva måte får vi innsikt i kjenslene Synnøve kjenner på som mor til ei rusavhengig dotter? Beskriv desse kjenslene.

4. I dag er Michelle rusfri, og både ho og Synnøve jobbar med rusproblematikk. Kva oppnår dei ved å blottlegge livserfaringane sine slik dei gjer i denne filmen?