Corsage

Om filmen

Elisabeth blir keisarinne i Austerrike som 16-åring. Ho er ung, vakker og svært populær. 25 år seinare er ho middelaldrande, og den tidlegare glitrande skjønnheita hennar er i ferd med å falme. Ho prøver å behalde den slanke figuren sin og får tenarane sine til å snøre korsettet stadig strammare.

Elisabeth blir sliten mellom skjønnheits- og kvinneidealet i tida og eit behov for å markere seg og gjere opprør mot det mannsdominerte samfunnet. I eit forsøk på å gjenoppleve ungdommen sin gjer ho fleire reiser og frigjer seg gradvis frå rolla si som keisarinne. Mot slutten av filmen tek ho eit dramatisk val og kvittar seg med det som har vore eit symbol på skjønnheita og statusen hennar.

Tematikken i filmen

Corsage handlar om ei kvinne som kjenner seg fanga i ei rolle og med skjønnheitsideal som er umogelege å leve etter. Dette blir representert ved sjølve symbolet på å halde kvinna på sin plass: korsettet. Det blir alltid litt snørt for stramt og fysisk hindrar kvinner sin rørslefridom og stemma deira.

Filmen handlar om likestilling og kvinner sin rett til å ha ei stemme, men ikkje minst handlar ho om å akseptere seg sjølv og sjå sin eigen verdi, uavhengig av krav og forventningar ein opplever frå omgivnadene.

Korleis filmen er eigna i skulen

Filmen eignar seg godt for samfunnsfag då han tek opp aktuelle tema som likestilling, feminisme og uoppnåelege skjønnheitsideal. Karakterane blir plasserte inn i ei historisk ramme samtidig som historia som blir fortald, kan kjennast igjen av mange kvinner i dag.

Keisarinne Elisabeth i filmen er på mange måtar ein moderne karakter sjølv om ho beveger seg i sfærar med heilt andre kvinne- og mannsideal enn i samfunnet i dag, og kontrasten er interessant i ein diskusjon om likestilling då og no.