Protein
Film om protein (4:05)
Denne filmen gir deg ei oversikt over kva protein er, og kvifor dei er viktige i kroppen din.
Protein har mange funksjonar
Protein finst i alle plantar og dyr og har mange ulike funksjonar. Protein inngår i oppbygging av vev og strukturar. I kroppen vår finst det protein i alle celler, og det blir brukt til å bygge opp hud, hår, negler og musklar. Andre protein bidreg til transport, lagring, hormon og enzym.
Type protein | Døme på protein | Funksjon |
|---|---|---|
Fordøyingsenzym | amylase, lipase, pepsin, trypsin | hjelpe til med nedbryting av næringsstoff |
Transport | hemoglobin, albumin | frakte stoff via blod og lymfe |
Struktur | aktin, tubulin, keratin | danne strukturar i cellene |
Hormon | insulin, tyroksin | overføre signal |
Forsvar | immunoglobulinar | forsvare kroppen mot farlege stoff |
Samantrekning | aktin, myosin | utføre muskelsamantrekking |
Lagring | lagringsprotein hos belgvekstar, albumin i eggekvite | gi næring i tidleg fosterstadium og til frøplantar |
Protein er kjeder av aminosyrer
Protein er store molekyl bygde opp av lange kjeder av aminosyrer. Aminosyrer er stoff som både er basar og syrer. Aminogruppa () har basiske eigenskapar, mens syregruppa () har sure eigenskapar.
Begge gruppene er bundne til det same karbonatomet. Til dette karbonatomet er det òg bunde eit hydrogenatom og ei gruppe som vi kan kalle R (restgruppe). Det er denne sidekjeda som skil ulike aminosyrer frå kvarandre. Det finst 20 aminosyrer som vi reknar som vanlege.
Kjedene med aminosyrer blir danna når fleire aminosyrer reagerer med kvarandre og dannar peptid. Protein er lange peptidkjeder.
Essensielle aminosyrer kan du ikkje lage sjølv
Tolv av dei tjue aminosyrene kan kroppen lage sjølv, men åtte av dei må vi få gjennom maten. Desse åtte aminosyrene blir kalla essensielle eller livsviktige. Spedbarn må i tillegg få cystein tilført utanfrå. Heldigvis er morsmjølk ei god kjelde for denne aminosyra.
Eit variert kosthald vil gi deg nok essensielle aminosyrer, men dei som unngår kjøtt, fisk, egg og/eller mjølkeprodukt, må tenke over kva dei et, for å sikre seg at dei får nok essensielle aminosyrer.
Aminosyrer som kroppen ikkje har behov for, blir forbrunne eller omdanna til feitt. Urea (urinstoff) er det avfallsproduktet som blir danna når protein blir brotne ned. Det inneheld nitrogenet frå aminosyrene og blir skild ut med urinen.
Denaturering – protein blir øydelagde
Fasongen til proteinet blir bestemd av mellom anna hydrogenbindingar mellom aminosyrene. Bindingane blir påverka av temperatur, pH og kjemikal, og gjer at proteinet forandrar form. Dermed vil ikkje proteinet fungere som det skal. Vi seier at proteinet blir denaturert. Når vi steiker egg, blir proteinet i eggekviten denaturert. Dette kan vi sjå ved at eggekviten blir kvit.
Proteinstruktur på 1–2–3–4!
Protein er bygd opp av lange kjeder av aminosyrer. Før dei får si endelege form, blir desse kjedene kalla polypeptidkjeder.
For at kjeda skal bli eit fungerande protein, må ho kveile og brette seg på bestemde måtar. Korleis det skjer, blir bestemt av rekkefølga på aminosyrene, som igjen blir bestemd av DNA-et vårt. Viss éi aminosyre er feil, kan heile proteinet få feil form og slutte å verke.
Vi deler strukturen til proteinet inn i fire nivå:
primærstruktur – rekkefølga på aminosyrene i kjeda
sekundærstruktur – korleis kjeda kveilar seg (til dømes som spiralar eller flak)
tertiærstruktur – korleis ulike delar av kjeda faldar seg vidare og blir haldne saman
kvartærstruktur – korleis fleire kjeder blir sette saman til eit protein
Oppgåver
Vel rett alternativ.