Oppgåve

Interaktivt innhald

Priskalkylar i handverksbedrifter

Her kan du øve på å berekne pris på oppdrag i typiske handverksbedrifter. Nedst på sida kan du laste ned oppgåvene som Word- og pdf-dokument.

Oppgåve 2

a) Eit tømrarfirma har 2 800 000 kroner i totale årlege kostnader. Dei har komme fram til at det totale talet på salbare arbeidstimar er 4 520.

Kva blir kostprisen per time?

Tips til oppgåva

Hugs at kostprisen per time er den prisen som gjer at inntekta frå arbeidstimane akkurat dekker dei totale årlege kostnadene til firmaet.

Løysing

Kostprisen per time blir $\frac{2 800 000 kr}{4 520 h} = 619 kr / h$ .

b) Eit større anleggsgartnarfirma har 12 500 000 i totale årlege kostnader. Dei reknar med at kvar tilsette anleggsgartnar har 1 200 seljelege timar i året. Det er 19 anleggsgartnarar i firmaet.

Kva blir kostprisen per time i firmaet?

Løysing

Totalt tal på seljelege timar: $1 200 h \cdot 19 = 22 800 h$

Kostprisen per time blir $\frac{12 500 000 kr}{22 800 h} = 548 kr / h$ .

c) Eit møbelsnikkarfirma ønsker å berekne talet på seljelege arbeidstimar. Dei reknar ut at kvar av dei tre tilsette har 1 575 disponible arbeidstimar per år. Dei går vidare ut frå at dei seljelege arbeidstimane utgjer 85 prosent av den disponible arbeidstida.

Kva blir det totale talet på seljelege timar per år for møbelsnikkarfirmaet?

Løysing

Totalt tal på disponible timar: $1 575 h \cdot 3 = 4 725 h$

Totalt tal på seljelege timar: $4 725 h \cdot 0, 85 = 4 016 h$

d) Nedanfor er informasjon om eit elektrikarfirma oppgitt.

Firmaet har 8 elektrikarar som jobbar fulltid.
Kvar elektrikar har 1 575 disponible arbeidstimar per år.
Dei reknar med at dei seljelege arbeidstimane utgjer 90 prosent av den disponible arbeidstida.
Firmaet har totale årlege kostnader på 7 200 000 kroner.

Hjelp elektrikarfirmaet med å berekne kostprisen per time.

Løysing

Totalt tal på disponible timar: $1 575 h \cdot 8 = 12 600 h$

Totalt tal på seljelege timar: $12 600 h \cdot 0, 9 = 11 340 h$

Kostprisen per time blir $\frac{7 200 000 kr}{11 340 h} = 635 kr / h$ .

e) Eit handverkarfirma har komme fram til at kostprisen per time er 685 kr/h. Dei ønsker å legge på 20 prosent forteneste på denne prisen.

Kva blir timeprisen utan meirverdiavgift med denne fortenesta?

Løysing

Vi må legge til 20 prosent. Vekstfaktoren for 20 prosent er 1,2. Timeprisen utan meirverdiavgift blir

$685 kr / h \cdot 1, 2 = 822 kr / h$

f) Kva blir timeprisen med meirverdiavgift for handverkarfirmaet i den førre oppgåva?

Løysing

Vi må legge til 25 prosent. Vekstfaktoren for 25 prosent er 1,2. Timeprisen med meirverdiavgift blir

$822 kr / h \cdot 1, 25 = 1 028 kr / h$

g) Eit skreddarfirma har ein kostpris per time på 597 kr/h. Dei ønsker å legge på 18 prosent forteneste.

Kva blir timeprisen med meirverdiavgift for skreddarfirmaet?

Løysing

Her skal vi først legge på 18 prosent og deretter 25 prosent. Når vi reknar med vekstfaktor, kan vi rekne ut alt i éi utrekning. Timeprisen med meirverdiavgift for skreddarfirmaet er

$597 kr / h \cdot 1, 18 \cdot 1, 25 = 881 kr / h$

Oppgave 3

a) Eit røyrleggarfirma skal legge røyr til vassboren golvvarme i eit nybygg. Firmaet kjøper røyra i kveilar på 50 m som kostar 1 090 kroner utan mva. Røyrleggarfirmaet bruker påslagstalet 2,3 for å berekne prisen på materiale ut til kundar.

Kva blir prisen med meirverdiavgift for denne røyrkveilen ut til kunden?

Løysing

Prisen med meirverdiavgift blir $1 090 kr \cdot 2, 3 = 2 507 kr$ .

b) Eit anna røyrleggarfirma tek ein pris med meirverdiavgift på 2 657 kroner for ein servant. Då har dei brukt påslagstalet 2,1.

Kor mykje betalte røyrleggarfirmaet for servanten utan meirverdiavgift?

Løysing

Her må vi rekne baklengs tilbake til innkjøpsprisen. Då må vi dele med påslagstalet. Innkjøpsprisen var

$\frac{2 657 kr}{2, 1} = 1 265 kr$

c) Det tredje røyrleggarfirmaet kjøpte eit dusjkabinett for 5 300 kroner og selde det til ein kunde for 10 070 kroner med meirverdiavgift i samband med rehabilitering av badet til kunden.

Kva påslagstal brukte firmaet?

Løysing

Påslagstalet fungerer som ein vekstfaktor. For å finne ein vekstfaktor tek vi den nye verdien og deler på den opphavlege. Gjer vi det, får vi at påslagstalet var

$\frac{10 070 kr}{5 300 kr} = 1, 9$

Oppgåve 4

Det vesle tømrarfirmaet ByggMeir har totale årlege kostnader på 3 700 000 kroner. Det er 4 tømrarar i firmaet, og firmaet reknar ut at talet på disponible timar for oppdrag for kvar av tømrarane er 1 575 timar i gjennomsnitt.

Dei har mykje å gjere, og firmaet kalkulerer derfor med at kvar tømrar i gjennomsnitt er ute på oppdrag i 95 prosent av den disponible tida.

ByggMeir kalkulerer med ei forteneste på timeprisen på 22 prosent.

a) Bruk informasjonen over og rekn ut timeprisen firmaet skal bruke ut til kundar.

Løysing

Vi må gjere følgande:

rekne ut det totale talet på seljelege timar per år for ByggMeir
rekne ut kostpris per time
legge til 22 % forteneste på kostprisen
legge på 25 % meirverdiavgift

Totalt tal på seljelege timar:

$1 575 h \cdot 0, 95 \cdot 4 = 5 985 h$

Kostpris per time:

$\frac{3 700 000 kr}{5 985 h} = 618 kr$

Timepris ut til kunde (med meirverdiavgift):

$618 kr \cdot 1, 22 \cdot 1, 25 = 942 kr$

b) I eit oppdrag skal ByggMeir setje opp ein lettvegg for å dele eit stort soverom i to. Materialforbruket er sett opp i tabellen nedanfor. Prisane er innkjøpsprisar, det vil seie det ByggMeir betaler for varene.

Materialforbruk, lettvegg
Material	Einingspris	Mengde
Gipsplater 12,5 $\times$ 1 200 $\times$ 2 400	41 kr/stk	6
Standarverk 48 $\times$ 98 mm	35 kr/m	27
Skruar til standarverket, eske med 100 skruar	135 kr/eske	3
Skruar til gipsplatene, eske med 50 skruar	89 kr/eske	2

ByggMeir reknar med det går 9 timar til å setje opp veggen. Firmaet bruker påslagstalet 2,15 på alle varer som blir brukte i samband med oppdrag.

Bruk eit rekneark og rekn ut prisen kunden må betale for å få sett opp veggen. Du kan bruke reknearket nedst på teorisida "Priskalkylar i handverksbedrifter" som utgangspunkt. Rekn òg ut meirverdiavgifta.

Løysing

Prisen for lettveggen med meirverdiavgift blir 12 292,10 kroner. Meirverdiavgifta utgjer 2 458,42 kroner.

Rekneark med løysing, lettvegg(XLSX)

c) I eit anna oppdrag skal ByggMeir setje opp eit lite søppelskur. Materialforbruket er sett opp i tabellen nedanfor. Prisane er det ByggMeir betaler for varene.

Materialforbruk, søppelskur
Material	Einingspris	Mengde
Kledning	21 kr/m	56
Standarverk 48 $\times$ 98 mm	35 kr/m	18
Skruar til standarverket, eske med 100 skruar	140 kr/eske	2
Skruar til kledninga, eske med 50 skruar	89 kr/eske	3
Takpapp, rull	690 kr/rull	1

ByggMeir reknar at to mann bruker 10 timar på å setje opp skuret. Påslagstalet er framleis 2,15.

Rekn ut prisen kunden må betale for søppelskuret, og kor stor meirverdiavgifta blir.

Løysing

Prisen med meirverdiavgift blir 25 382,45 kroner. Meirverdiavgifta utgjer 5 076,49 kroner.

Rekneark med løysing(XLSX)

Oppgåve 5

På teorisida viser vi korleis vi reknar ut sjølve meirverdiavgifta ut ifrå ein pris der meirverdiavgifta er inkludert. Vi gjer dette ved å dele prisen på 1,25 og deretter gonge med 0,25.

a) Finn ein raskare måte å rekne ut meirverdiavgifta på.

Løysing

Vi kan slå saman dei to rekneoperasjonane i éin ved å rekne ut

$\frac{0, 25}{1, 25} = \frac{25}{125} = \frac{25}{5 \cdot 25} = \frac{1}{5}$

Meirverdiavgifta er $\frac{1}{5}$ av prisen med meirverdiavgift. Det betyr at vi finn meirverdiavgifta ved å dele prisen på 5.

b) Forklar kvifor vi kan ta denne "snarvegen" ved å setje opp forholdet mellom meirverdiavgifta og prisen utan meirverdiavgift.

Tips til oppgåva

Set opp forholdet mellom meirverdiavgifta og prisen utan meirverdiavgift som 1 : x.

Løysing

Meirverdiavgifta er 25 prosent, eller ein fjerdedel, av prisen utan meirverdiavgift. Det betyr at forholdet mellom meirverdiavgifta og prisen utan meirverdiavgift er 1 : 4. Det betyr, dersom vi samanliknar med ei saftblanding, at prisen med meirverdiavgift består av 1 del meirverdiavgift og 4 deler pris utan meirverdiavgift, altså totalt 5 delar. Så når meirverdiavgifta er éin slik del, finn vi ho ved å dele prisen med meirverdiavgift på 5.

c) Kontroller at resultatet i oppgåve b) er gyldig ved å bruke resultata i oppgåve 4 b) og 4 c).

Oppgåve 6

Eit handverkarfirma har totale årlege kostnader på 9 900 000 kroner. Dei ønsker at kostnadene skal dekkast berre av inntekta frå arbeidstimane. I tillegg ønsker dei ei forteneste på arbeidstimane på 20 prosent.

a) Kor stor må inntekta frå arbeidstimane vere for at firmaet skal oppnå dette?

Løysing

Inntekta frå arbeidstimane må då vere 20 prosent større enn dei totale årlege kostnadene. Inntektene må vere

$9 900 000 kr \cdot 1, 2 = 11 880 000 kr$

b) Firmaet reknar med at kvar tilsett har 1 200 seljelege timar. Dei ønsker at timeprisen ut til kundar maksimalt skal vere 1 000 kroner.

Kor mange arbeidstimar må firmaet minst selje for at timeprisen ut til kundane maksimalt skal vere 1 000 kroner?

Løysing

Først reknar vi ut kor mange timar firmaet må selje for at inntektene skal bli 11 880 000 kroner når timeprisen er 1 000 kr per time.

$\frac{11 880 000 kr}{1 000 kr / h} = 11 880 h$

c) Kor mange handverkarar må firmaet ha for å dekke opp for arbeidstimane i oppgåve b)?

Løysing

Sidan kvar handverkar er ute på oppdrag i 1 200 timar, blir talet på handverkarar

$\frac{11 880}{1 200} = 9, 9$

Firmaet treng derfor minst 10 tilsette for å oppnå denne inndekninga.

Nedlastbare filer

Her kan du laste ned oppgåvene som Word- og pdf-dokument.

Priskalkylar i handverksbedrifter(DOCX)
Priskalkylar i handverksbedrifter(PDF)

Priskalkulering og anbod

Priskalkylar i handverksbedrifter

Oppgåve 1

Oppgåve 2

Oppgave 3

Oppgåve 4

Oppgåve 5

Oppgåve 6

Nedlastbare filer