Topunktsperspektiv

Oppgåve 1. Teikn prisme i topunktsperspektiv

Instruksjonsfilm

I filmen under (lengde 6:22) får du ei grunnleggande innføring i topunktsperspektiv. Vi viser trinn for trinn korleis du kan teikne prisme i ulike høgder. Eit prisme er ein tredimensjonal geometrisk figur. Her har vi brukt firkantar som endeflater.

Del 1: Fugleperspektiv

Ein fugl som flyr, ser verda ovanfrå. Derfor kallar vi dette perspektivet for fugleperspektiv. No skal du teikne eit prisme ved å følge rettleiinga i instruksjonsfilmen over eller ved å følge beskrivinga i punkta under:

1. Teikn opp ei horisontlinje på arket ditt, og plasser to forsvinningspunkt i kvar sin ende av horisontlinja.

2. Begynn med å lage ein vertikal strek under horisontlinja di.

3. Når du ser eit prisme frå hjørnet, vil sidene som er parallelle, møtast i same forsvinningspunkt. Trekk hjelpelinjer frå begge endene av streken du har teikna, og opp til begge forsvinningspunkta.

4. Avgjer kor djupt prismet skal vere ved å setje to vertikale strekar mellom hjelpelinjene som går mot same forsvinningspunkt. Trekk så ei linje frå kvart hjørne og opp til det andre forsvinningspunktet.

5. Marker linjene i prismet med ein svart penn, og la hjelpelinjene som er teikna med blyant, stå.

Del 2: Froskeperspektiv

Froskeperspektiv er perspektiv sett nedanfrå. Du har då låg augehøgde og ser opp på motivet ditt. Følg same framgangsmåte som i del 1, men no skal du teikne prismet over horisontlinja.

Del 3: Varier ulike perspektiv

Fyll arket med prisme sett frå ulike perspektiv. Sjå korleis du kan gjere dette, i instruksjonsfilmen over.

Oppgåve 2. Øv på topunktsperspektiv i eit bybilete

Instruksjonsfilmar

Filmen under (lengde 16:18) viser korleis du kan teikne hus i topunktsperspektiv. Her bruker vi hjelpelinjer til å teikne inn møne.

I filmen under (lengde 3:23) lærer du å teikne ei trapp i topunktsperspektiv.

Leik med djupneverknadene du kan skape med topunktsperspektiv

Teikn eit gatehjørne du ser for deg i fantasien, og lag din eigen draumeby. Dette kan vere ein framtidsby viss du ønsker det. Bruk topunktsperspektiv til å skape djupne.

1. Start med å plassere horisontlinja og to forsvinningspunkt.

2. Konstruer det første huset på gatehjørnet og to vegar som går inn mot forsvinningspunkta.

3. Bruk fantasien og jobb vidare med bybiletet.

4. Bruk valfri teknikk til å setje farge på bybiletet ditt. Prøv å la fargebruken forsterke kjensla av djupne.