Projeksjonsvinkel og distribusjon
Håret fell naturleg i forhold til tyngdekrafta og hovudforma, når kunden held hovudet rett. I frisørfaget er projeksjonsvinkelen den vinkelen håret blir halde i forhold til det naturlege fallet når det blir klipt.
Vi deler hovudet inn i arbeidsområde som kallast seksjon og passé. Det kallast seksjon viss det er større parti som blir delt inn, og passé viss det er mindre parti. Sjølve inndelinga mellom desse partia kallast ei delelinje. Vinkelen på delelinja varierer i forhold til korleis designlinja skal sjå ut. Ei designlinje er den avsluttande linja i klippen. Vinkelen på delelinja blir òg bestemd etter kva klippeform du jobbar med, og kva effekt du ønskjer å oppnå i hårfrisyren.
Distribusjon er i frisørfaget eit uttrykk for korleis vi held håret i forhold til delelinja. Vi har tre ulike distribusjonar:
- naturleg distribusjon
- perpendikulær distribusjon
- skiftingsdistribusjon
Naturleg distribusjon
Naturleg distribusjon er ein klipp i naturleg fallretning, og delelinja er horisontal.
Perpendikulær distribusjon
Perpendikulær distribusjon er ein klipp vinkelrett ut frå delelinja, med ei klippelinje som følgjer delelinja.
Skiftingsdistribusjon
Skiftingsdistribusjon er ein klipp som ikkje er vinkelrett frå delelinja, som vi bruker for å auke lengdeforskjellar i klippen.
