Effilering

Ordet effilere kjem frå latin og betyr å tynne ut håret ved klipping. Effilering er når vi klipper ein viss prosent av håret med ei spesiell effileringssaks eller skjer ut hår med ei vanleg saks.

Vi skil mellom tre ulike former for effilering:

• Roteffilering er når vi klipper ein viss prosent av håret om lag ein centimeter frå hovudbotnen. Det blir gjort for å få støttehår som gir volum i frisyren om det trengst i det indre området.
• Mengdeeffilering er når vi effilerer om lag fire til fem centimeter frå hovudbotnen. Det blir gjort for å redusere hårmengda. Mengdeeffilering gjer at tjukt hår ligg penare og blir lettare å stelle.
• Spisseffilering blir gjort i hårtuppane. Det vil hindre at håret ser butt ut, og spissane flyt betre i kvarandre.