Søknad på stilling og tilsetjing i ungdomsbedrifta

Tilsetjingsprosessen

Det er fleire måtar å legge opp ein tilsetjingsprosess på. Før stillingar kan lysast ut, bør dagleg leiar vere på plass. Då kan dagleg leiar saman med lærar vere dei som tilset dei andre elevane i bedrifta. Det er styret (eventuelt med hjelp av lærer) som tilset dagleg leiar. Viss det er fleire enn éin kandidat til leiarstillinga, bør de legge opp til ein søknadsprosess på det. Stillingsannonsen kan til dømes styret lage i fellesskap.

Stillingsannonsen

Generelt bør ein stillingsannonse innehalde følgande punkt:

• tittel på stillinga

• informasjon om bedrifta

• arbeidsoppgåver og ansvarsområde for denne stillinga

• ønskt kompetanse og eigenskapar hos personen som skal tilsetjast

• kontaktinformasjon (namn og telefonnummer) til dagleg leiar i bedrifta

• søknadsfrist

Stillingsannonsane kan formast ut av dagleg leiar og lærar.

Søknad

Når dagleg leiar er på plass, kan dei andre som ønsker å vere med i bedrifta, søke på dei stillingane som blir lyste ut.

Ein søknad bør innehalde det følgande:

• avsendar, dato, mottakar

• overskrift ("Søknad på stilling som ...")

• kort innleiing om korleis du fekk vite om stillinga

• hovuddel der du beskriv motivasjonen for å søke, personlege eigenskapar, erfaringar, utdanning og praksis som er relevant for stillinga

• kort avslutning og signatur

Du kan òg gjerne legge ved ein CV. Ein CV er ei kortfatta oversikt over kva du kan, og kva du har gjort så langt i livet ditt.

Intervju

Intervjua for resten av stillingane i bedrifta blir gjennomførte av dagleg leiar i samarbeid med læraren. Saman vel dei òg kven som får stillingane.

Dagleg leiar og lærar kan utarbeide relevante intervjuspørsmål, anten på eiga hand eller saman med klassen eller bedrifta.

Tilsetjing og arbeidskontrakt

Det er dagleg leiar som tilset medarbeidarar til dei ulike stillingane som var lyste ut. Når medarbeidaren har takka ja, er det tid for å signere arbeidskontrakt. Ein arbeidskontrakt eller arbeidsavtale er ein avtale mellom arbeidsgivar og tilsett. Han bør innehalde informasjon om

• arbeidsoppgåver og ansvarsområde

• varigheita til stillinga

• eventuell utbetaling av lønn